وزیر اطلاعات و نشریات عطا اللہ تارڑ کا کہنا ہے کہ وفاقی دارالحکومت اسلام آباد کا امن تباہ کرنے کی کوشش کی گئی ہے، مسلح شرپسند عناصر کا قائد مراد سعید وزیراعلیٰ ہاؤس پشاور میں ہی روپوش ہے۔ سیکرٹری داخلہ خرم علی آغا و دیگر کے ساتھ پریس کانفرنس کرتے ہوئے انہوں نے کہا کہ گزشتہ کافی دنوں سے میڈیا اور سوشل میڈیا چینلز پر احتجاج کی ناکامی کو چھپانے کیلئے جھوٹا بیانیہ دیا جارہا ہے، پاکستانی عوام کے سامنے تمام تر حقائق کو ان کی اصل صحت کے ساتھ رکھنا ضروری ہے، گزشتہ ہونے والے کئی مظاہروں میں تربیت یافتہ جرائم پیشہ اور افغانی شہری مظاہروں میں موجود تھے، وہ تمام لوگ اسلحہ بھی بخوبی چلانا جانتے تھے لیکن اس دفعہ کے احتجاج میں آخری کال کے نام سے سنسنی بھی پھیلائی گئی۔
وزیر اطلاعات نےکہا کہ یہ سارے احتجاج غیر ملکی مہمانوں کی آمد کے موقع پر ہی کیوں کیے جاتے ہیں؟ ریاست ان اوچھے ہتھکنڈوں کے سامنے ہارتی نہیں، ریاست کا کام رٹ کو بحال رکھنا اور امن و امان قائم کرنے کے ساتھ، شہریوں کے حقوق اور حفاظت کو یقینی بنانا ہوتا ہے، ہمارے پاس پہلے سے ہی انٹیلیجنس رپورٹس تھیں کہ فائنل کال میں ایسی کوشش کی جائے گی کہ خون خرابہ ہو اور لاشیں گرائی جائیں، نیز اگرٹیکس پیئر کے پیسوں سے کسی بھی صوبائی حکومت کو وسائل دیئے جاتے ہیں تو اس کامقصد یہ نہیں کہ غیر قانونی احتجاج پر کڑوڑوں روپے خرچ ہوں۔

انہوں نے کہا کہ جس وقت احتجاج چل رہا تھا اس وقت بیلا روس کے صدر کے ساتھ اعلیٰ سطح اجلاس ختم ہوا تھا، کنٹینر کے اوپر سے گرفتار 16 سالہ لڑکا افغان شہری ہی ہے، وفاقی وزیر داخلہ محسن نقوی کے جاری کردہ ایک بیان کو سیاق و سباق سے ہٹ کر ایسے پیش کیا گیا جیسے وہ افغانستان کی حکومت اور لوگوں کے مخالف ہے، افغانستان کے حوالے سے ریاست کی پالیسی بڑی واضح ہے، ہم افغانستان اور اپنے ملک میں امن کے خواہش مند ہیں۔
عطا تارڑ نے کہا کہ احتجاج میں 37 افغانی شہری شامل تھے، ان کا احتجاج سے کیا تعلق تھا؟ مظاہرین میں جرائم پیشہ لوگ بھی شامل تھے جنہوں نے احتجاج کی آڑ میں پناہ لی ہوئی تھی، مہذب دنیا کے کسی بھی احتجاج میں اسلحہ لے کر آنے کی اجازت نہیں حکومت ہی جگہ کا تعین کرتی ہے اور پھر اسی کے مطابق احتجاج کا کہا جاتا ہے، کسی بھی مہذب معاشرے میں مظاہرین کے پاس اسلحہ نہیں ہوتا، خیبرپختونخواہ حکومت کے خزانے سے کڑوڑوں روپے ان بے تکی چیزوں پر خرچ کیے جارہے ہیں، مظاہرین سے 45 بندوقیں بھی بازیاب کرائی گئی ہیں۔
انہوں نے یہ بھی کہا کہ ریاست کبھی بھی اپنے لوگوں پر حملہ آور نہیں ہوتی، پی ٹی آئی نے احتجاج شروع ہی خون خرابے سے کیا، رینجرز اہلکاروں کے پر اس مقصد کے پیش نظر گاڑی چڑھا دی کہ ہم ہر کسی کے اوپر بھی گاڑی چڑھا سکتے ہیں، اب مراد سعید سی ایم ہاؤس کے پی میں روپوش ہیں، وہ نا صرف اس احتجاج میں خود شریک تھے بلکہ ان کے ساتھ تربیت یافتہ گروپ بھی موجود تھے جن کو مظاہرے میں لاشیں گرانے کی احکامات دیئے گئے تھے، آخر یہ کس طرح کی سیاست ہے؟ مراد سعید یہ کام پہلے بھی کرتے رہے ہیں، انہوں نے اس کام کی باقاعدہ منصوبہ بندی کی، ریڈ زون میں داخل ہونے کی ضد ریاستی رٹ کو ختم کرنا تھا۔
وفاقی وزیر کا کہنا تھا کہ اسلحہ انتشار پھیلانے والوں کے پاس تھا، بین الاقوامی میڈیا پر بھی پراپیگنڈہ کیا جارہا ہے، ایک بھی ویڈیو قانون نافذ کرنے والے اداروں کی طرف سے براہ راست فائرنگ کی نہیں آئی، لاشوں کے حوالے سے جو پراپیگنڈہ کیا جارہا ہے، پمز اور پولی کلینک ہسپتال دونوں نے اپنی پریس ریلیز میں واضح کہا ہے کہ قانون نافذ کرنے والے اداروں کی فائرنگ نہیں کی گئی اور نہ ہی اس طرح سے کوئی ہلاکت ہوئی ہے
، اگر فائرنگ کی گئی تو وہ احتجاجی مظاہرین کی طرف سے ہی کی گئی ہے۔
عطا تارڑ نے کہا کہ کرم میں کہرام مچا ہوا ہے مگر تمام تر توجہ سیاست کے پر ہی ہے، اگر یہ فیصلہ کیا تھا تو پھر موقع سے فرار کیوں ہوئے؟ ملکی معیشت کو احتجاج کے باعث یومیہ 192 ارب روپے کا نقصان ہوا ہے، ان کے پاس براہ راست فائرنگ کا کوئی بھی ثبوت نہیں ہے، ان کو حقیقی مایوسی سیاسی طور پر اور لاشیں گرانے میں ناکامی پر ہوئی ہے، میں خیبرپختونخواہ کی عوام کو سلام پیش کرتا ہوں جنہوں نے ان کی کال مسترد کی اور ان کے پاس آخر میں تقریباً 2 ہزار لوگ ہی رہ گئے، خیبرپختونخوا کی عوام تعلیم اور صحت چاہتے ہیں اور وہ اپنے صوبے کو ترقی یافتہ دیکھنا چاہتے ہیں وہ انتشار کی سیاست نہیں چاہتے۔