حکومت نے بندرگاہوں پر پھنسے ہوئے ونٹیج کاروں کو ایک بار رعایت دینے کی تجویز کو مسترد کر دیا ہے، اور کہا ہے کہ یہ کاریں پالیسی کی خلاف ورزی کرتے ہوئے درآمد کی گئی ہیں۔

اس لیے درآمد کنندگان کو ایسی کسی رعایت کی اجازت نہیں دی جا سکتی۔ وزارت تجارت کی جانب سے پیش کی گئی سمری پر بحث کرتے ہوئے کابینہ نے سندھ ہائیکورٹ کی ہدایت اور مشاہدات کو بھی مدنظر رکھا، اور ونٹیج کاروں کی درآمد میں ایف بی آر کی خلاف ورزی پر بھی غور کیا۔

تاہم، کابینہ نے متفقہ طور پر وزارت تجارت کی سمری کو مسترد کر دیا، جس میں مختلف بندرگاہوں پر پھنسے ہوئے تمام ونٹیج کاروں کو ایک بار رعایت دینے کی سفارش کی گئی تھی۔ کابینہ کو بتایا گیا کہ یہ سمری پہلے بھی پیش کی گئی تھی، جسے کابینہ نے مسترد کر دیا تھا۔

اب سندھ ہائیکورٹ کے احکامات کی روشنی میں واضح فیصلے کے لیے دوبارہ پیش کی جا رہی ہے۔ ہائیکورٹ نے ہدایت کی ہے کہ کابینہ تین ہفتوں میں اسپیکنگ آرڈر پاس کرے، لیکن کابینہ نے اس تجویز کو ایک بار پھر مسترد کر دیا ہے۔

وفاقی وزیر نجکاری عبدالعلیم خان نے کہا ہے کہ پی آئی اے کی پرائیویٹائزیشن کے معاملات تیزی سے حل ہو رہے ہیں، اور جلد ہی اچھی خبر ملنے کی توقع ہے۔

وفاقی وزیر نجکاری، سرمایہ کاری بورڈ اور مواصلات نے پی آئی اے کی نجکاری کے حوالے سے اب تک کی پیشرفت پر گفتگو کرتے ہوئے کہا کہ اسلام آباد۔ یورپ کے لیے پی آئی اے کی پروازوں کا آغاز ایک خوش آئند اقدام ہے، یہ فلائٹ آپریشن اس ادارے کی نجکاری کے لیے ایک اہم سنگ میل ثابت ہوگا، اب لوگوں کو یہ یقین ہو چکا ہے کہ وہ یورپ کے لیے پی آئی اے کے ذریعے سفر کر سکیں گے۔

عبدالعلیم خان نے مزید کہا کہ ان شاء اللہ جلد ہی پی آئی اے کو برطانیہ اور امریکہ میں بھی آپریشنل کرنے کی خوشخبری ملے گی، پی آئی اے کی نجکاری میں حائل مختلف مسائل حل ہو چکے ہیں، اور اب تیزی سے مراحل طے کیے جائیں گے، پی آئی اے کی فروخت کے لیے آئی ایم ایف نے دو اہم مسائل کی منظوری دے دی ہے۔

وفاقی وزیر نے یہ بھی کہا کہ نئے جہازوں کی خریداری پر 18 فیصد سیلز ٹیکس ختم کر دیا جائے گا، اور پی آئی اے کے تمام نقصانات کو ہولڈنگ کمپنی میں منتقل کیا جائے گا، تاکہ پاکستان انٹرنیشنل ایئر لائنز کو کسی پرانی واجب الادا رقم کے بغیر فروخت کیا جا سکے۔

ان کا کہنا تھا کہ ان اصلاحات کے بعد “انویسٹرز” کے لیے پی آئی اے کی خریداری زیادہ پرکشش ہو جائے گی۔