news
پاکستان اسٹاک مارکیٹ میں 950 پوائنٹس کا شاندار اضافہ
کراچی: پاکستان اسٹاک مارکیٹ میں آج غیر معمولی تیزی کا رجحان دیکھنے میں آیا، جس کے باعث کے ایس ای 100 انڈیکس میں 950 پوائنٹس کا شاندار اضافہ ریکارڈ کیا گیا۔ کاروباری ہفتے کے تیسرے دن جیسے ہی بازارِ حصص کا آغاز ہوا، ابتدائی طور پر پاکستان اسٹاک مارکیٹ نے 100 پوائنٹس اضافے کے ساتھ اپنا سفر شروع کیا اور انڈیکس 1,22,346 پوائنٹس کی سطح پر آ گیا۔ بعدازاں سرمایہ کاروں کے بڑھتے ہوئے اعتماد اور مثبت معاشی توقعات کے نتیجے میں مارکیٹ میں تیزی کا سلسلہ برقرار رہا اور انڈیکس مزید 358 پوائنٹس بڑھ کر 1,22,604 پوائنٹس پر پہنچ گیا۔ کاروبار کے دوران سرمایہ کاری کا ماحول مزید بہتر ہوتا گیا، اور دن کے اختتام تک مجموعی طور پر 950 پوائنٹس کا نمایاں اضافہ دیکھنے میں آیا، جس سے انڈیکس 1,23,196 پوائنٹس کی بلند سطح پر پہنچ گیا۔ معاشی ماہرین کا کہنا ہے کہ مارکیٹ میں حالیہ تیزی اقتصادی پالیسیوں میں بہتری اور استحکام کی عکاسی کرتی ہے، جو سرمایہ کاروں کے اعتماد کی بحالی میں اہم کردار ادا کر رہا ہے۔