آن لائن اسٹریمنگ پلیٹ فارم نیٹ فلکس کی نئی کورین سیریز ’جینی – میک اے وِش‘ ریلیز ہوتے ہی شدید تنازعے کا شکار ہوگئی۔ یہ سیریز 3 اکتوبر کو ریلیز کی گئی، تاہم ناظرین کا کہنا ہے کہ اس میں اسلامی عقائد کو مسخ اور مذہبی تصورات کو غلط انداز میں پیش کیا گیا ہے۔

میڈیا رپورٹس کے مطابق، سیریز میں ابلیس (شیطان) کو ایک جینی یعنی جن کے طور پر مثبت اور رومانوی کردار میں دکھایا گیا ہے، جبکہ فرشتوں کو منفی کرداروں کے طور پر پیش کیا گیا ہے۔ ناظرین نے اس مواد کو مذہبی توہین قرار دیتے ہوئے نیٹ فلکس کے بائیکاٹ کا مطالبہ کر دیا ہے۔

سیریز کی کہانی ابلیس کے گرد گھومتی ہے جو غرور میں آکر انسان کو سجدہ کرنے سے انکار کرتا ہے، لیکن بعد میں محبت میں گرفتار ہوکر سجدہ کرنے پر مجبور ہوتا ہے۔ اس میں انسان کے ایک سے زائد جنم دکھائے گئے ہیں، جو اسلامی تعلیمات کے منافی تصور کیا جا رہا ہے۔

شائقین کا کہنا ہے کہ تفریح کے نام پر مذہبی عقائد کو مسخ کرنا قابلِ مذمت ہے۔ میڈیا رپورٹس کے مطابق سیریز میں کورین اداکار کم وہ بن، نوح سینگ ہینگ اور بئی سوزی نے مرکزی کردار ادا کیے ہیں۔

دوسری جانب، نیٹ فلکس اور ڈرامہ سازوں نے اس تنازع پر تاحال خاموشی اختیار کی ہوئی ہے، البتہ ایک اداکارہ نے مؤقف دیا کہ یہ محض تفریحی مقصد کے لیے بنایا گیا ہے اور اس میں حقیقت اور فینٹسی کا امتزاج پیش کیا گیا ہے تاکہ ناظرین لطف اندوز ہو سکیں۔

پاکستان اسٹاک ایکسچینج میں کاروباری ہفتے کے پہلے روز نمایاں تیزی دیکھی گئی۔ ابتدائی کاروباری گھنٹوں میں مارکیٹ میں اتار چڑھاؤ کے بعد سرمایہ کاروں کے اعتماد میں اضافہ ہوا، جس کے نتیجے میں مارکیٹ مثبت زون میں داخل ہو گئی۔ کاروبار کے اختتام پر پاکستان اسٹاک ایکسچینج کے 100 انڈیکس میں 2436 پوائنٹس کا بڑا اضافہ ریکارڈ کیا گیا، جس کے بعد انڈیکس 1,66,242 پوائنٹس کی سطح پر بند ہوا۔

کاروبار کے دوران 100 انڈیکس ایک موقع پر 1,66,421 پوائنٹس کی بلند ترین سطح کو بھی چھو گیا۔ آج مجموعی طور پر 1.47 ارب شیئرز کے سودے ہوئے جن کی مالیت تقریباً 51.87 ارب روپے رہی۔ سرمایہ کاروں کی دلچسپی بنیادی طور پر توانائی، بینکنگ اور ٹیلی کام کے شعبوں میں دیکھی گئی۔

واضح رہے کہ گزشتہ ہفتے کے آخری روز 100 انڈیکس 1,63,806 پوائنٹس پر بند ہوا تھا، جس کے بعد یہ نیا ہفتہ زبردست تیزی کے ساتھ شروع ہوا۔ ماہرین کے مطابق مقامی کرنسی کی مضبوطی اور معاشی اعداد و شمار میں بہتری نے سرمایہ کاروں کے اعتماد کو بحال کیا ہے۔