اسلام آباد: آرمی چیف جنرل سید عاصم منیر نے واضح الفاظ میں کہا ہے کہ پاکستان کو اپنی سالمیت کے دفاع کا بخوبی ہنر آتا ہے، اور افواج پاکستان نے آپریشن “بنیان مرصوص” کے ذریعے بھارت کو بھرپور جواب دے کر اپنی بات سچ ثابت کی ہے۔

سیکیورٹی ذرائع کے مطابق، پاکستان نے بارہا بھارت کو خبردار کیا تھا کہ امن کی خواہش کو کمزوری نہ سمجھا جائے، اور افواج پاکستان نے ہر بار ثابت کیا کہ وہ ہر قسم کی جارحیت کا موثر جواب دینے کی بھرپور صلاحیت رکھتی ہیں۔

آرمی چیف نے قرآن پاک کی آیات کا حوالہ دیتے ہوئے کہا کہ “اللہ کی مدد سے کمزور طاقتیں بھی بڑی قوتوں کو شکست دے سکتی ہیں”، اور پاکستان کی تاریخ گواہ ہے کہ قوم اور افواج دشمن کے سامنے ہمیشہ سیسہ پلائی دیوار بن کر کھڑے رہے ہیں۔

انہوں نے کہا کہ 13 لاکھ بھارتی فوج ہمیں مرعوب نہیں کر سکتی، پاکستان کے پاس دفاعی صلاحیتیں مکمل طور پر موجود ہیں، اور یہ قوم قربانی دے کر اپنا وطن حاصل کرنے والی قوم ہے۔

ڈی جی آئی ایس پی آر نے بھی بھارتی جارحیت پر دوٹوک جواب دیتے ہوئے کہا: “ہم بھارت کی طاقت یا مکاری سے مرعوب ہونے والی قوم نہیں ہیں، اب ہمارے جواب کا انتظار کرو۔”

دفاعی ماہرین نے بھی اعتراف کیا کہ افواج پاکستان نے اپنی قربانی، جذبے اور قوتِ عمل سے یہ ثابت کر دیا ہے کہ پاکستان کو کوئی نقصان نہیں پہنچا سکتا۔