پاک فوج کے سربراہ جنرل سید عاصم منیر نے کہا ہے کہ مسلح افواج پاکستان کے عوام کی حفاظت اور سلامتی کو یقینی بنانے میں کوئی کسر نہیں چھوڑیں گی۔ انہوں نے یہ بھی کہا کہ پاک فوج ریاست کی سلامتی اور استحکام کے لیے دہشت گردی کے خلاف ایک ڈھال کی حیثیت رکھے گی۔ بنوں میں ہونے والے گھناؤنے حملے کے منصوبہ سازوں اور سہولت کاروں کو جلد انصاف کے کٹہرے میں لایا جائے گا، چاہے وہ کہیں بھی ہوں۔ شہریوں، بشمول بچوں، خواتین اور بزرگوں کو بہیمانہ طور پر نشانہ بنانا اسلام دشمن خوارج کے اصل عزائم کو بے نقاب کرتا ہے۔ دہشت گردی کے خلاف جنگ میں قومی یکجہتی کی ضرورت ہے، اور کسی کو بھی ملکی امن اور استحکام میں خلل ڈالنے کی اجازت نہیں دی جائے گی۔ دشمن عناصر کی ایما پر کارروائی کرنے والے خوارج اور ان کے سہولت کاروں کے خلاف جنگ اپنے منطقی انجام تک جاری رہے گی۔ آرمی چیف نے اس بات پر زور دیا کہ فتنہ الخوارج سمیت دہشت گرد گروہ افغان سرزمین سے پاکستان کے خلاف کارروائیاں جاری رکھے ہوئے ہیں۔ حالیہ دہشت گرد حملوں میں غیر ملکی ہتھیاروں کا استعمال اس بات کا واضح ثبوت ہے کہ افغانستان ایسے عناصر کی محفوظ پناہ گاہ ہے۔ آئی ایس پی آر کے مطابق، آرمی چیف جنرل سید عاصم منیر نے بنوں چھاؤنی پر خوارج کا حملہ ناکام بنانے کے بعد بنوں کا دورہ کیا، جہاں انہوں نے سی ایم ایچ بنوں میں زخمی اہلکاروں کی عیادت کی۔

کوئٹہ میں جان محمد روڈ کے قریب دھماکے کے نتیجے میں 3 افراد زخمی ہوگئے۔

پولیس کے مطابق دھماکے کی آواز اطراف کے علاقوں میں بھی سنی گئی۔

ریسکیو، پولیس اور دیگر قانون نافذ کرنے والے اداروں کے اہلکار جائے دھماکا پہنچ گئے جنہوں نے امدادی کاموں کا آغاز کر دیا ہے، زخمیوں کو اسپتال پہنچایا گیا ہے۔

دھماکے کی نوعیت کا فوری طور پر اندازہ نہیں ہو سکا ہے۔