امریکی صدر ڈونلڈ ٹرمپ نے انکشاف کیا ہے کہ انہیں اطلاعات ملی ہیں کہ پاکستان اور افغانستان کے درمیان جنگ جاری ہے۔ انہوں نے کہا کہ وہ جلد واپس آکر اس صورتحال کا جائزہ لیں گے۔

ٹرمپ نے امریکا سے اسرائیل جاتے ہوئے طیارے میں صحافیوں سے گفتگو کرتے ہوئے کہا کہ وہ ایک بار پھر امن کی کوشش کریں گے کیونکہ وہ “جنگیں ختم کرنے میں ماہر” ہیں۔ امریکی صدر نے مزید بتایا کہ ماضی میں پاکستان اور بھارت کی ممکنہ جنگ کو انہوں نے ٹیرف کی مدد سے روکنے میں کردار ادا کیا تھا۔

دوسری جانب پاک فوج نے افغان طالبان اور بھارت کے حمایت یافتہ گروہ فتنہ الخوارج کے حملوں کا بھرپور جواب دیتے ہوئے دشمن کی 21 چوکیاں تباہ کر دیں اور متعدد مقامات پر عارضی قبضہ حاصل کیا ہے۔

آئی ایس پی آر کے مطابق پاک فوج کی فضائی کارروائیوں میں طالبان کے کیمپ اور چوکیوں کو نشانہ بنایا گیا، جس میں 200 سے زائد جنگجو ہلاک ہوئے۔ جھڑپوں میں 23 پاکستانی فوجی شہید اور 29 زخمی ہوئے۔ ترجمان کے مطابق دشمن کے جنگجو اپنے ٹھکانے چھوڑ کر فرار ہوگئے۔

امریکی صدر ڈونلڈ ٹرمپ نے اعلان کیا ہے کہ چین سے درآمد کی جانے والی تمام مصنوعات پر سو فیصد ٹیرف عائد کیا جائے گا۔
ان کا کہنا تھا کہ یہ فیصلہ نومبر سے پہلے بھی نافذ کیا جا سکتا ہے۔ اس اقدام سے امریکا اور چین کے درمیان تجارتی تعلقات میں ایک نیا تناؤ پیدا ہونے کا امکان ہے۔

مزید برآں، صدر ٹرمپ نے کہا کہ ان کی چینی صدر شی جن پنگ سے ملاقات منسوخ نہیں ہوئی، بلکہ وہ مشرقِ وسطیٰ کے اہم دورے پر جا رہے ہیں جہاں وہ مصر کا دورہ کریں گے اور اسرائیلی پارلیمنٹ سے خطاب بھی کریں گے۔
انہوں نے مزید بتایا کہ یرغمالیوں کی واپسی پیر سے شروع ہوگی۔

دوسری جانب، صدر ٹرمپ نے کہا کہ ان کی حکومت نے پاکستان اور بھارت سمیت آٹھ مختلف جنگوں کو رکوانے میں کردار ادا کیا۔
ان کے مطابق پاک بھارت کشیدگی کے دوران سات طیارے گرائے گئے تھے، اور دونوں ممالک کو خبردار کیا گیا تھا کہ اگر جنگ ہوئی تو امریکا کی جانب سے بھاری اقتصادی پابندیاں اور اضافی ٹیرف عائد کیے جائیں گے۔

یہ اعلان اس وقت سامنے آیا ہے جب امریکی معیشت چینی مصنوعات پر انحصار کم کرنے کی پالیسی پر گامزن ہے۔
ٹرمپ کے مطابق، یہ ٹیرف امریکی صنعت اور روزگار کے تحفظ کے لیے ناگزیر ہے۔ تاہم، بعض معاشی ماہرین کا کہنا ہے کہ اس فیصلے سے اشیائے خوردونوش کی قیمتوں میں اضافہ اور عالمی تجارتی کشیدگی بڑھنے کا خدشہ ہے۔