فیلڈ مارشل سید عاصم منیر، نشان امتیاز (ملٹری) کی زیر صدارت کور کمانڈرز کانفرنس کا انعقاد ہوا، جس میں بھارتی حمایت یافتہ دہشتگرد گروہوں کے حالیہ حملوں میں شہید ہونے والے سیکیورٹی اہلکاروں کے ایصالِ ثواب کے لیے فاتحہ خوانی کی گئی۔ فورم نے ان حملوں کے خلاف فورسز کی کامیاب جوابی کارروائیوں کا جائزہ لیتے ہوئے اس عزم کا اظہار کیا کہ شہداء کا خون ہرگز رائیگاں نہیں جائے گا اور عوام کی سلامتی ہر صورت میں مسلح افواج کی اولین ترجیح رہے گی۔ فورم نے زور دیا کہ بھارت کی سرپرستی میں کام کرنے والے دہشتگردوں کے خلاف ہر سطح پر فیصلہ کن اور جامع اقدامات ناگزیر ہیں، خاص طور پر فتنہ الخوارج اور فتنہ الہندوستان جیسے پراکسی گروپوں کو مکمل طور پر کچلنے کی ضرورت پر زور دیا گیا۔

کور کمانڈرز کانفرنس کے دوران آرمی چیف نے وزیر اعظم کے ہمراہ حالیہ کامیاب سفارتی دوروں – جن میں ایران، ترکیہ، آذربائیجان، سعودی عرب اور متحدہ عرب امارات شامل ہیں – کی تفصیلات سے شرکاء کو آگاہ کیا۔ انہیں اپنے تاریخی اور منفرد دورۂ امریکہ کے حوالے سے بھی بریفنگ دی گئی، جس میں پاکستان کا دوٹوک مؤقف امریکی قیادت کے سامنے پیش کیا گیا۔ فورم نے عالمی سطح پر طاقت کے استعمال کے بڑھتے ہوئے رجحان پر تشویش کا اظہار کیا، جسے اب خارجہ پالیسی کے ایک اہم ہتھیار کے طور پر استعمال کیا جا رہا ہے۔ اس صورتحال میں پاکستان کے لیے قومی اتحاد، خود انحصاری اور دفاعی صلاحیتوں میں اضافہ وقت کی اہم ضرورت قرار دیا گیا۔

فیلڈ مارشل عاصم منیر نے بھارت کی طرف سے دو طرفہ کشیدگی کو تیسرے فریق کی شمولیت سے بڑھانے کی کوششوں کو سختی سے مسترد کرتے ہوئے کہا کہ یہ بھارت کی خطے میں خود کو نیٹ سیکیورٹی پرووائڈر کے طور پر پیش کرنے کی ناکام کوشش ہے۔ انہوں نے بھارت کے توسیع پسندانہ عزائم اور ہندوتوا پر مبنی انتہا پسندانہ رویے کو عالمی امن کے لیے خطرہ قرار دیا۔ فورم کو موجودہ و ابھرتے ہوئے خطرات، جنگی حکمت عملی اور پاک فوج کی جدید کاری سے متعلق بریفنگ دی گئی۔ آرمی چیف نے پاک فضائیہ اور پاک بحریہ کی ہم آہنگی کی کوششوں کو سراہتے ہوئے تینوں افواج کی یکجہتی پر مکمل اعتماد کا اظہار کیا اور اس عزم کا اعادہ کیا کہ ملک کے خلاف ہر خطرے کا بھرپور جواب دیا جائے گا۔