وائٹ ہاؤس کے قریب فائرنگ، مشکوک شخص زخمی

امریکی صدر کی رہائش گاہ وائٹ ہاؤس کے قریب ایک فائرنگ کا واقعہ پیش آیا، جہاں ایک ملزم نے سکیورٹی اہلکاروں پر آتش گیر مادے سے حملہ کیا۔ عالمی میڈیا کے مطابق یہ واقعہ اتوار کی صبح پیش آیا، جب پولیس کو اطلاع ملی کہ ایک شخص واشنگٹن ڈی سی میں آتشیں اسلحے کے ساتھ موجود ہے اور ممکنہ طور پر خودکشی کے ارادے سے آیا ہے۔ اس پر سیکرٹ سروس نے مشکوک مسلح شخص پر فائرنگ کی، جس کے نتیجے میں وہ گولی لگنے سے زخمی ہوگیا۔ بعد میں اس مشکوک شخص کو ہسپتال منتقل کیا گیا، جبکہ فائرنگ کے وقت صدر ڈونلڈ ٹرمپ وائٹ ہاؤس میں موجود نہیں تھے۔

سیکرٹ سروس نے بتایا کہ جب سکیورٹی اہلکار مسلح شخص کے قریب پہنچے تو اس نے آتش گیر مادہ بھی پھینکا۔ حملہ آور پیدل تھا اور اسے وائٹ ہاؤس سے 5 منٹ کی دوری پر نشانہ بنایا گیا۔ خیال کیا جاتا ہے کہ مشکوک شخص انڈیانا سے سفر کر رہا تھا۔ اہلکار جب اس کی کار کے قریب پہنچے تو انہوں نے اسے آتشیں اسلحے کے ساتھ پایا، جس کے بعد مسلح تصادم شروع ہوگیا۔

سیکرٹ سروس کے ترجمان انتھونی گگلیلمی نے کہا کہ اس واقعے میں کوئی ایجنٹ زخمی نہیں ہوا، جبکہ معاملے کی مزید تحقیقات واشنگٹن ڈی سی پولیس ڈیپارٹمنٹ کرے گا۔ میٹروپولیٹن پولیس ڈیپارٹمنٹ نے واقعے کی چھان بین شروع کر دی ہے، اور فورس انویسٹی گیشن ٹیم اس معاملے کی تحقیقات کر رہی ہے۔