دنیا بھر میں سوئنگ کے سلطان کے لقب سے مشہور قومی کرکٹ ٹیم کے سابق کپتان وسیم اکرم کی اہلیہ شنیرا اکرم نے اپنے شوہر کا نام طلاق یافتہ افراد کی فہرست میں دیکھ کر برہمی کا اظہار کیا ہے۔ سماجی رابطے کی ویب سائٹ ایکس پر ایک سوشل میڈیا پیج نے مختلف ممالک کی کرکٹ ٹیموں سے تعلق رکھنے والے 12 کھلاڑیوں کی فہرست جاری کی ہے، جن میں ان کی طلاق ہونے کا دعویٰ کیا گیا ہے۔ اس فہرست میں پاکستانی سابق کپتان فاسٹ بالر وسیم اکرم اور بھارتی کھلاڑی انیل کمبلے کے نام بھی شامل ہیں، حالانکہ ان دونوں کی طلاق نہیں ہوئی ہے۔ اس پوسٹ نے سماجی کارکن اور کرکٹ لیجنڈ وسیم اکرم کی اہلیہ کی توجہ فوراً حاصل کر لی۔ شنیرا اکرم نے جھوٹی معلومات پھیلانے پر سوشل میڈیا پیج کو تنقید کا نشانہ بنایا اور پوسٹ کو دوبارہ شیئر کرتے ہوئے ان پر سخت الفاظ میں تنقید کی۔

انہوں نے اس جھوٹی پوسٹ کو شیئر کرتے ہوئے لکھا کہ ’بلاشبہ آپ لوگ ہر چیز کو سیاق و سباق سے ہٹ کر پیش کرتے ہیں، اور آپ درست اور قابلِ اعتماد معلومات سے بھی محروم ہیں‘۔ انہوں نے اس کے ساتھ ہی خبروں کی تصدیق کرنے کی اہمیت پر بھی زور دیا۔ واضح رہے کہ وسیم اکرم نے 2013ء میں شنیرا سے قبل ہما مفتی سے 12 اکتوبر 1993ء کو پسند کی شادی کی تھی، جو 2009ء میں انتقال کر گئی تھیں۔