بالی ووڈ کے میگا اسٹار سلمان خان 14 مارچ کو مسٹر پرفیکشنسٹ عامر خان کی 60ویں سالگرہ سے پہلے ان کے گھر ملنے پہنچے۔ اس موقع پر سلمان خان کی آمد کی ویڈیو سخت سیکیورٹی کے درمیان سوشل میڈیا پر وائرل ہو رہی ہے۔

ویڈیو میں دیکھا جا سکتا ہے کہ سلمان خان ‘وائے پلس سیکیورٹی’ کے ساتھ اپنی گاڑی میں عامر خان کی رہائش گاہ کے احاطے میں داخل ہو رہے ہیں، اور ان کے ساتھ ایک پولیس وین اور دو کاریں بھی موجود ہیں۔ مداحوں نے بالی ووڈ کے دونوں خانز کی ملاقات پر خوشی کا اظہار کیا ہے۔

اس سے پہلے، سلمان خان نے عامر خان سے ان کے بیٹے جنید خان کی فلم ‘لوویاپا’ کے پریمیئر کے موقع پر ملاقات کی تھی، جہاں شاہ رخ خان بھی موجود تھے، اور تینوں خانز کو ایک ساتھ فوٹوگرافرز کے سامنے پوز دیتے ہوئے دیکھا گیا تھا۔

یہ بات بھی قابل ذکر ہے کہ عامر خان 14 مارچ کو اپنی 60ویں سالگرہ منائیں گے، اور اس موقع پر پی وی آر سنیماز نے ان کی شاندار خدمات کو سراہتے ہوئے ‘عامر خان فلم فیسٹیول’ کا اعلان کیا ہے، جس میں ان کی کامیاب ترین فلمیں دوبارہ پیش کی جائیں گی۔

دوسری جانب، سلمان خان اپنی آنے والی فلم ‘سکندر’ کی ریلیز کی تیاریوں میں مصروف ہیں، جو عید کے موقع پر سینما گھروں میں پیش کی جائے گی۔

دنیا کی مشہور کمپنی گوگل نے پاکستان میں ڈیجیٹل ادائیگیوں کی سہولت، گوگل والٹ، متعارف کروا دی ہے۔ ابتدائی مرحلے میں، بینک الفلاح، بینک آف پنجاب، فیصل بینک، جاز کیش، ایچ بی ایل، میزان بینک اور یو بی ایل کے کارڈ ہولڈرز اپنے کارڈز کو گوگل والٹ میں شامل کر سکتے ہیں۔ تفصیلات کے مطابق، گوگل والٹ دراصل ایک ڈیجیٹل بٹوا ہے جہاں صارفین مختلف کارڈز اور دستاویزات محفوظ کر سکتے ہیں۔ ویزا اور ماسٹر کارڈ کے حامل صارفین اپنے بینک کارڈز کو بھی اس میں شامل کر سکتے ہیں۔ یہ سہولت ڈیجیٹل بینکنگ اور الیکٹرانک ادائیگیوں کے فروغ میں ایک اہم سنگ میل ثابت ہوگی۔

اس حوالے سے گوگل پاکستان کے کنٹری ڈائریکٹر، فرحان قریشی، نے کہا کہ گوگل والٹ صارفین کو محفوظ، آسان اور مفید ڈیجیٹل ادائیگیوں کے ساتھ ساتھ بورڈنگ پاسز، لائلٹی کارڈز، اہم اشیاء کی رسائی اور دیگر کارڈز کو ذخیرہ کرنے کی سہولت فراہم کرے گی۔ انہوں نے مزید کہا کہ گوگل والٹ کا آغاز پاکستان میں ڈیجیٹل ادائیگیوں کو فروغ دینے کی ہماری کوششوں کا حصہ ہے، جس سے صارفین کو محفوظ اور تیز تر ادائیگی کا موقع ملے گا۔

انہوں نے یہ بھی بتایا کہ پاکستان میں ڈیجیٹل ادائیگیوں کا شعبہ تیزی سے ترقی کر رہا ہے، اور گوگل والٹ ایک محفوظ، آسان اور مؤثر طریقہ فراہم کرتا ہے جس کے ذریعے صارفین ادائیگیاں کر سکتے ہیں اور خریداری کر سکتے ہیں۔