وزیراعظم کا خیبرپختونخواہ میں سیکیورٹی فورسز کی کامیاب کارروائیوں پر خراج تحسین

وزیراعظم محمد شہباز شریف نے ضلع ڈیرہ اسماعیل خان اور ضلع شمالی وزیرستان میں فتنتہ الخوارج کے دہشتگردوں کے خلاف کامیاب کارروائیوں میں 7 خوارجی دہشتگردوں کو ہلاک کرنے پر سکیورٹی فورسز کی تعریف کی ہے۔ تفصیلات کے مطابق، وزیراعظم شہباز شریف نے ڈیرہ اسماعیل خان اور شمالی وزیرستان میں فتنتہ الخوارج کے دہشت گردوں کے خلاف ان کی کامیابیوں پر سیکیورٹی فورسز کی ستائش کی۔ اپنے ایک بیان میں انہوں نے کہا کہ ان کارروائیوں کے دوران 7 خوارجی دہشت گردوں کو ہلاک کرنے پر سکیورٹی فورسز کو خراج تحسین پیش کیا، اور یہ بھی کہا کہ پوری قوم سکیورٹی فورسز کو سلام پیش کرتی ہے، اور ہم ملک سے ہر قسم کی دہشت گردی کے خاتمے کے لئے پرعزم ہیں۔

اسی طرح وفاقی وزیرداخلہ محسن نقوی نے بھی 7 خوارجی دہشت گردوں کو ہلاک کرنے پر سکیورٹی فورسز کی تعریف کی، اور کہا کہ سکیورٹی فورسز نے خوارجی دہشت گردوں کے مذموم عزائم کو ناکام بنایا۔ انہوں نے مزید کہا کہ خوارجی دہشت گردوں کے خلاف کامیاب آپریشنز پر فورسز کو شاباش دیتے ہیں، اور خیبرپختونخواہ میں قیام امن کے لئے سکیورٹی فورسز کے آپریشنز قابل تعریف ہیں۔ سیکیورٹی فورسز کی بہادری پر قوم کو فخر ہے۔ بتایا جا رہا ہے کہ صوبہ خیبرپختونخواہ کے علاقوں ڈیرہ اسماعیل خان اور شمالی وزیرستان میں سکیورٹی فورسز کے آپریشنز کے دوران یہ کامیابیاں حاصل کی گئی ہیں۔