بین المذاہب ہم آہنگی: وزیراعظم اور وزیراعلیٰ پنجاب کا امن و رواداری پر زور

وزیراعظم شہباز شریف نے کہا کہ انتہا پسندی اور تفرقہ انگیز بیان بازی ہمارے معاشرے کے لیے خطرہ ہیں۔ عالمی ہفتہ برائے بین المذاہب ہم آہنگی کے موقع پر اپنے پیغام میں انہوں نے کہا کہ آج ہم عالمی برادری کے ساتھ مل کر بین المذاہب ہم آہنگی کا ہفتہ منا رہے ہیں کیونکہ ہم سماجی ہم آہنگی اور اقدار کی پاسداری پر یقین رکھتے ہیں۔
وزیراعظم شہباز شریف نے مزید کہا کہ اسلام انصاف، رحم اور مخلوقات کے احترام کی تعلیم دیتا ہے، جبکہ انتہا پسندی اور تفرقہ انگیز بیان بازی سماجی تانے بانے کے لیے خطرہ ہیں۔ دنیا اس وقت عدم برداشت اور تقسیم کے بڑھتے ہوئے چیلنجز کا سامنا کر رہی ہے، اس لیے امن اور اتحاد کے لیے اپنے اجتماعی عزم کا اعادہ کرنا ضروری ہے، اور شہری بھائی چارے کے رشتوں کو مضبوط کرنے کے لیے کردار ادا کرنا چاہیے۔

انہوں نے کہا کہ لوگوں کو باہمی برداشت اور تعاون کی اقدار اپنانے کی ترغیب دینی چاہیے۔ ہم رواداری اور باہمی احترام کے ماحول کو فروغ دینے کے لیے پرعزم ہیں، اور خوف کی فضا پھیلانے والوں کے خلاف ہم اکٹھے ہو کر جواب دیں گے۔ نفرت کے بیج بونے والوں کا مقابلہ ہم بات چیت کے ذریعے کریں گے، اور مذہبی اسکالرز، کمیونٹی رہنما اور شہری معاشرے میں مثبت کردار ادا کریں گے۔ پاکستان تمام مذاہب کے لیے ایک محفوظ ملک ہے۔
اسی حوالے سے وزیراعلیٰ پنجاب مریم نواز کہتی ہیں کہ پاکستان ہمیشہ سے مختلف مذاہب اور ثقافتوں کا گہوارہ رہا ہے۔