news
مراکش کشتی حادثہ: انسانی سمگلنگ گروہ کا انکشاف، اہم سہولتکار گرفتار
حکام نے مراکش کشتی حادثے میں ملوث انسانی سمگلنگ کے گروہ کا سراغ لگا لیا ہے، جس کے نتیجے میں ایک اہم سہولتکار کو بھی گرفتار کیا گیا۔ میڈیا رپورٹس کے مطابق، وفاقی تحقیقاتی ادارے ایف آئی اے کمپوزٹ سرکل فیصل آباد نے اس حادثے میں ملوث انسانی سمگلنگ کے گینگ کا پتہ لگایا، جس کے بعد پاکستان سے یورپ تک پھیلے بین الاقوامی نیٹ ورک کو بے نقاب کرتے ہوئے اہم سہولتکار عبدالغفار کو اسلام آباد ایئرپورٹ سے گرفتار کر لیا گیا۔ گرفتار ملزم کے خلاف مقدمہ درج کر کے تحقیقات کا آغاز کر دیا گیا ہے۔
یہ بھی بتایا گیا ہے کہ کشتی حادثے میں زندہ بچ جانے والے 7 مسافر اور ملزم عبدالغفار پاکستان پہنچے، جن کی نشاندہی پر اسے حراست میں لے کر فیصل آباد منتقل کیا گیا۔ تحقیقات کے دوران معلوم ہوا کہ ملزم 2023ء سے موریطانیہ میں مقیم تھا، جبکہ اس کے والد اور قریبی رشتہ دار 2018ء سے وہاں انسانی سمگلنگ میں سرگرم تھے۔ ملزم عبدالغفار بھی کئی سالوں سے انسانی سمگلنگ میں ملوث رہا ہے اور اس نے درجنوں افراد کو غیر قانونی طور پر یورپ بھیجنے میں مدد فراہم کی۔
مزید یہ کہ ملزم کا تعلق پیر محل ٹوبہ ٹیک سنگھ سے ہے اور اس کی نشاندہی پر مزید اہم گرفتاریاں متوقع ہیں۔ ایف آئی اے کو ملزم کے پاس سے افریقی سمگلر ابوبکر سے روابط کے شواہد بھی ملے ہیں۔