شہباز حکومت کے 8 ماہ میں قرضہ 70 ہزار ارب سے تجاوز، خیبرپختونخواہ قرض اتارنے والا پہلا صوبہ

شہباز شریف حکومت کے 8 ماہ میں قرضوں میں ہزاروں ارب روپے کا بے تحاشہ اضافہ ہوا ہے، جس کی وجہ سے وفاقی حکومت کا قرضہ 70 ہزار ارب روپے کی سطح سے اوپر چلا گیا۔ تفصیلات کے مطابق، وفاقی حکومت کے قرضے ملکی تاریخ کی بلند ترین سطح پر پہنچ گئے ہیں۔ اسٹیٹ بینک کی رپورٹ کے مطابق، نومبر 2024 تک مرکزی حکومت کے قرضے 70 ہزار 366 ارب روپے تک پہنچ چکے ہیں۔
میڈیا رپورٹس کے مطابق، وفاقی حکومت کا قرضوں پر انحصار مزید بڑھ گیا ہے، اور اسٹیٹ بینک نے نومبر 2024 تک وفاقی حکومت کے قرضوں کا ڈیٹا جاری کیا ہے۔ اسٹیٹ بینک کی دستاویز کے مطابق، رواں مالی سال کے پہلے 5 ماہ، یعنی جولائی سے نومبر 2024 کے دوران، وفاقی حکومت کے قرضوں میں ایک ہزار 452 ارب روپے کا اضافہ ہوا، جبکہ صرف نومبر کے مہینے میں مرکزی حکومت کے قرضوں میں ایک ہزار 252 ارب روپے کا اضافہ ہوا۔

دستاویز کے مطابق، دسمبر 2023 سے نومبر 2024 کے ایک سال میں وفاقی حکومت کے قرضوں میں 6 ہزار 975 ارب روپے کا اضافہ ریکارڈ کیا گیا۔ اسٹیٹ بینک کے مطابق، نومبر 2024 تک وفاقی حکومت کے قرضوں کا حجم 70 ہزار 366 ارب روپے رہا، جس میں مقامی قرضہ 48 ہزار 585 ارب روپے اور بیرونی قرضے کا حصہ 21 ہزار 780 ارب روپے تھا۔ دوسری جانب، خیبرپختونخواہ میں تحریک انصاف کی حکومت قرضہ اتارنے والی ملک کی پہلی صوبائی حکومت بن گئی۔ اس حوالے سے مشیر خزانہ خیبرپختونخواہ نے بھی بیان دیا ہے۔