صوبہ پنجاب میں نیا نظام متعارف کرانے کے لیے آئین میں ترامیم کی سفارش کی تیاری مکمل کر لی گئی ہے۔ میڈیا رپورٹس کے مطابق پنجاب اسمبلی میں آج ایک اہم قرارداد پیش کیے جانے کا امکان ہے، جس میں صوبے میں وفاق کے طرز کا پارلیمانی نظام متعارف کرانے اور سینیٹ کے قیام کا مطالبہ کیا جائے گا۔ اس مقصد کے لیے مسلم لیگ ن کے رکن سمیع اللہ خان، پیپلز پارٹی کے علی حیدر اور دیگر اراکین نے مل کر قرارداد تیار کی ہے۔
ذرائع کے مطابق، قرارداد میں کہا گیا ہے کہ سرکاری اعداد و شمار کے مطابق پنجاب کی آبادی 12 کروڑ 40 لاکھ افراد پر مشتمل ہے، جو دنیا کے 171 ممالک سے زیادہ ہے۔ دنیا میں صرف 11 ممالک ایسے ہیں جن کی آبادی پنجاب سے زیادہ ہے۔ اتنی بڑی آبادی والے صوبے میں مؤثر حکمرانی اور مشاورت کے لیے مختلف شعبوں کے ماہرین اور نمائندوں کی شمولیت ضروری ہے تاکہ وہ اپنی مہارت اور تجربے کی بنیاد پر صوبے کی ترقی اور خوشحالی میں کردار ادا کر سکیں۔

قرارداد میں یہ مؤقف اپنایا گیا ہے کہ ایوان میں موجود مختلف شعبہ ہائے زندگی سے تعلق رکھنے والے ماہرین اور نمائندوں کو نامزد یا منتخب کیا جائے گا تاکہ وہ صوبے کے انتظامی امور میں معاون ثابت ہو سکیں۔ تاہم، موجودہ آئینی ڈھانچے میں اس کی گنجائش موجود نہیں، اس لیے وفاقی حکومت سے سفارش کی جاتی ہے کہ آئین پاکستان میں ضروری ترامیم کی جائیں۔

پاکستانی سفیر کو امریکا سے بے دخل کر دیا گیا، ترکمانستان میں تعینات پاکستانی سفیر کو امریکی شہر لاس اینجلس پہنچنے پر امریکا میں داخل ہونے کی اجازت نہیں ملی۔ تفصیلات کے مطابق، امریکا کی جانب سے پاکستان سمیت کئی ممالک کے شہریوں پر امریکا میں داخلے پر پابندی عائد کیے جانے سے پہلے ایک پاکستانی سفارتی اہلکار کو امریکا سے ڈی پورٹ کیے جانے کا انکشاف ہوا ہے۔
اے آر وائی نیوز کے مطابق، مبینہ انتظامی بدعنوانی کے الزامات کا سامنا کرنے والے پاکستانی سفیر کو نجی دورے کے سلسلے میں امریکا پہنچنے پر امریکی امیگریشن حکام نے بے دخل کر دیا۔ اے آر وائی نیوز کی رپورٹ کے مطابق، ذرائع نے بتایا کہ ترکمانستان میں تعینات پاکستان کے سفیر کے کے احسن وگن کو امریکی شہر لاس اینجلس سے واپس بھیج دیا گیا، حالانکہ ان کے پاس امریکی ویزا اور تمام قانونی سفری دستاویزات موجود تھیں۔

ذرائع نے مزید بتایا کہ ترکمانستان میں پاکستانی سفیر کے کے احسن وگن چھٹیوں پر لاس اینجلس جا رہے تھے، لیکن امریکی امیگریشن حکام نے انہیں لاس اینجلس ایئرپورٹ پر روک لیا۔ ذرائع کے مطابق، کے کے احسن وگن پر امریکا میں تعیناتی کے دوران انتظامی بدعنوانی میں ملوث ہونے کا الزام ہے۔ اس واقعے کے بعد وزیر خارجہ اسحاق ڈار اور سیکریٹری خارجہ آمنہ بلوچ کو صورتحال کا جائزہ لینے کے لیے طلب کیا گیا۔