وفاقی وزیرِ پاور اویس لغاری نے وزیرِ اعلیٰ پنجاب مریم نواز کو خط لکھ کر بجلی کے بقایاجات کی وصولی کا مطالبہ کیا ہے۔ خط میں نشاندہی کی گئی ہے کہ حکومتِ پنجاب پر مختلف بجلی کمپنیوں کے 38 ارب روپے سے زائد کے بقایاجات ہیں۔

خط کے مطابق پنجاب حکومت پر لیسکو کے 17 ارب 27 کروڑ روپے، گیپکو کے 2 ارب 84 کروڑ روپے، فیسکو کے 5 ارب 5 کروڑ روپے، آئیسکو کے 2 ارب 93 کروڑ روپے، اور میپکو کے 9 ارب 90 کروڑ روپے واجب الادا ہیں۔

اویس لغاری نے خط میں لکھا کہ وفاقی حکومت نے وزیرِ اعظم کی ہدایت پر بجلی کے بقایاجات کی وصولی کے لیے مہم شروع کی ہے۔ اس کے علاوہ پاور ڈویژن نے بجلی کمپنیوں کی کارکردگی کو بہتر بنانے کے لیے اصلاحاتی اقدامات کا بھی آغاز کیا ہے۔

خط میں واضح کیا گیا ہے کہ بجلی کمپنیوں کے مالی مسائل کو حل کرنے کے لیے بقایاجات کی فوری ادائیگی ضروری ہے، تاکہ پاور سیکٹر کی بہتری کے اقدامات مؤثر طریقے سے جاری رکھے جا سکیں

پاکستان بھر کے صارفین انٹرنیٹ کی سست روی سے پریشان ہیں جس سے تعلیم اور آن لائن کاروبار پر اثرات مرتب ہو رہے ہیں۔ رپورٹس کے مطابق، انٹرنیٹ کے مسائل کی وجہ سے پاکستان میں فری لانسرز کو ملنے والی آن لائن اسائنمنٹس میں تقریباً 70 فیصد کمی ریکارڈ کی گئی ہے۔

دس دسمبر کو براڈ بینڈ اور موبائل فون صارفین دونوں کے لیے انٹرنیٹ کی رفتار سست تھی جبکہ پاکستانی ٹیلی کمیونی کیشن اتھارٹی (پی ٹی اے) کی جانب سے کوئی سرکاری بیان بھی سامنے نہیں آیا۔ ورلڈ پاپولیشن ریویو کی جاری کردہ رپورٹ میں بتایا گیا ہے کہ انٹرنیٹ کی رفتار کی تازہ ترین درجہ بندی میں پاکستان دنیا میں 198 ویں نمبر پر ہے۔ انٹرنیٹ کی رفتار کے لحاظ سے پاکستان فلسطین، بھوٹان، گھانا، عراق، ایران، لبنان اور لیبیا سے نیچے ہے۔ پاکستان میں موبائل انٹرنیٹ ڈاؤن لوڈ کی اوسط رفتار 19.59 ایم بی پی ایس ہے جبکہ براڈ بینڈ انٹرنیٹ کی رفتار اوسطاً 15.52 ایم بی پی ایس ہے۔

اس صورتحال میں موبائل فون استعمال کرنے والے صارفین انٹرنیٹ کی رفتار خود چیک کر سکتے ہیں۔ گوگل پلے اسٹور اور ایپل اسٹور پر مختلف ایپس دستیاب ہیں جو صارفین کو اپنے موبائل کنکشن کی رفتار کو آسانی سے چیک کرنے کے قابل بناتی ہیں۔ اوکلا جیسے مفت اسپیڈ ٹیسٹ ایپس اینڈرائیڈ اور آئی او ایس دونوں کے لیے دستیاب ہیں، جو صارفین کو ڈاؤن لوڈ اور اپ لوڈ کی رفتار جانچنے میں مدد دیتی ہیں۔