news
پنجاب میں ماہانہ اجرت 37 ہزار روپے کرنے کا نوٹیفکیشن جاری
پنجاب حکومت نے وزیر اعلیٰ مریم نواز شریف کے حکم پر کم سے کم ماہانہ اجرت 37 ہزار روپے مقرر کرنے کا نوٹیفکیشن جاری کر دیا ہے۔ اس فیصلے کا مقصد دیہاڑی دار اور غیر ہنر مند مزدوروں کی کم از کم تنخواہ میں اضافہ کرنا ہے، جو پہلے 32 ہزار روپے تھی۔
نوٹیفکیشن کے مطابق، یومیہ 8 گھنٹے کام کرنے والے مزدوروں کی یومیہ تنخواہ 1423 روپے 07 پیسے ہوگی۔ وزیر اعلیٰ نے اس بات کو یقینی بنانے کے لیے کہ کم سے کم اجرت کی فراہمی میں کوئی کوتاہی نہ ہو، اسٹیک ہولڈرز کو فوری طور پر اعتماد میں لینے کی ہدایت بھی دی ہے۔
مریم نواز نے کہا کہ صوبے کے ہر مزدور کے حقوق کا تحفظ حکومت کی ذمہ داری ہے اور ہر ورکر کو پوری اجرت نہ ملنا ایک تکلیف دہ امر ہے۔ انہوں نے اس بات پر بھی افسوس کا اظہار کیا کہ گھریلو ملازمین پر لیبر قوانین کا نفاذ ابھی تک نہیں ہوا ہے۔ وزیر اعلیٰ نے ورک پلیس پر ایس او پیز اور ہدایات پر سختی سے عملدرآمد کی ضرورت پر بھی زور دیا۔