سانحہ 9 مئی کے مجرموں نے اپنے اعترافی بیانات میں بانی پی ٹی آئی عمران خان کی فوج مخالف تقاریر کو ذمہ دار قرار دیا۔ پاک فوج کے ترجمان (آئی ایس پی آر) نے تمام مجرموں کے اعترافی بیانات جاری کر دیے۔ اپنے بیانات میں مجرموں نے پارٹی کے دیگر رہنماﺅں کے اکسانے کو بھی 9 مئی کے واقعے کا ذمہ دار ٹھہرایا ہے۔ جناح ہاوس حملے میں ملوث پی ٹی آئی کے شرپسند جان محمد خان کو 10 سال قید بامشقت کی سزا سنائی گئی ہے۔

اپنے اقرار جرم میں جان محمد خان نے اعتراف کیا کہ وہ جناح ہاوس پر حملے میں شامل تھا اور اس نے ملٹری یونیفارم کی شرٹ پہن کر ویڈیو بنائی اور پھر اس شرٹ کو جلا دیا۔ پی ٹی آئی کے شدت پسند شان علی کو بھی 10 سال قید بامشقت کی سزا سنائی گئی ہے۔

مجرم علی شان نے اپنے اقرار جرم میں کہا کہ عمران خان کی آرمی مخالف تقاریر نے میری ذہن سازی کی۔ جب عمران خان کی گرفتاری ہوئی تو سیاسی رہنماﺅں کے ورغلانے پر میں نے جناح ہاوس پر حملہ کیا۔ میں نے جناح ہاوس میں جا کر توڑ پھوڑ کی۔ اسی طرح پی ٹی آئی کے شرپسند داود خان کو بھی جناح ہاوس حملے میں 10 سال قید بامشقت کی سزا سنائی گئی ہے۔ مجرم داود خان نے بھی اپنے اعتراف جرم میں بتایا کہ میں نے یاسمین راشد اور حسان نیازی کے اکسانے پر جناح ہاوس پر حملہ کیا۔ تقاریر کے ذریعے ہمارے ذہنوں میں فوج کے خلاف نفرت بھری گئی۔

وزیردفاع خواجہ آصف نے کہا ہے کہ نو مئی جیسے بھیانک دن کے منصوبہ سازوں کے خلاف کارروائی کیے بغیر یہ معاملہ ختم نہیں ہوگا۔ اپنے ایک بیان میں انہوں نے کہا کہ آج سانحہ 9 مئی کے 25 ملزموں کو سزائیں سنائی گئی ہیں، جبکہ ہونا تو یہ چاہیے تھا کہ امریکہ اور برطانیہ کی طرح فوری انصاف فراہم کیا جاتا۔ اس تاخیر نے ملزموں اور ان کے سہولت کاروں کے حوصلے بڑھا دیے ہیں، اور ایک تاریک دن کی مذمت کرنے سے بھی گریز کیا گیا، جس کی وجہ سے شہداء اور غازیوں کی توہین کرنے والوں کو ہیرو بنا دیا گیا۔

مسلم لیگ ن کے سینئر رہنماء خواجہ آصف نے مزید کہا کہ نو مئی ایک بڑا حادثہ تھا، اور یہ سزائیں ان لوگوں کو دی گئی ہیں جو اس منصوبے پر عمل درآمد کر رہے تھے۔ یہ سزائیں بہت پہلے سنائی جانی چاہیئں تھیں۔ ابھی تو جو کارکن قانون کے ہاتھوں میں آئے ہیں، ان کے گریبان تک پہنچنا ضروری ہے، کیونکہ جب تک قانون ان منصوبہ سازوں کے خلاف کارروائی نہیں کرتا، اس سلسلے کا اختتام نہیں ہوگا۔ ایسے عناصر وطن دشمنی کے حوصلے بڑھاتے رہیں گے۔

اسی حوالے سے آئی ایس پی آر نے کہا ہے کہ دیگر ملزمان کی سزاؤں کا اعلان بھی ان کے قانونی عمل مکمل ہونے کے بعد کیا جائے گا۔ 9 مئی کی سزاؤں کا فیصلہ قوم کے لیے انصاف کی فراہمی میں ایک اہم سنگ میل ہے، اور یہ سزائیں ان تمام لوگوں کے لیے ایک واضح پیغام ہیں جو چند مفاد پرستوں کے ہاتھوں استحصال کا شکار ہوتے ہیں۔