آزاد حیثیت سے منتخب سینیٹر فیصل واوڈا نے کہا ہے کہ آرمی چیف نے اپنے ادارے کا احتساب سب سے پہلے کیا، جس سے جنرل عاصم منیر نے واضح پیغام دیا کہ پاکستان سب سے پہلے ہے۔ میڈیا رپورٹس کے مطابق سینیٹر فیصل واوڈا کی زیرِ صدارت سینیٹ کی قائمہ کمیٹی میری ٹائم کا اجلاس ہوا، جہاں انہوں نے گفتگو کرتے ہوئے کہا کہ سیکریٹری میری ٹائم نے 60 ارب روپے کی چوری بچانے میں اہم کردار ادا کیا۔ انہوں نے کہا کہ وہ میری ٹائم میں کرپشن کے ثبوت لے کر آئے ہیں، اور انہوں نے 8 ماہ تک ثبوت اکٹھے کیے اور مطالعہ کیا۔

ان کا کہنا تھا کہ وہ میری ٹائم کے 728 صفحات پڑھ کر آئے ہیں، اور سیکریٹری میری ٹائم نے 60 ارب روپے کی زمین کا پراسیس منسوخ کیا۔ انہوں نے دعویٰ کیا کہ ہم نے 60 ارب روپے کی کرپشن روک لی ہے، اور انہیں 2005ء اور 2015ء کا بیک گراؤنڈ بھی معلوم ہے۔ انہوں نے سوال کیا کہ اگر یہ معاہدہ درست تھا تو اتوار کو دفتر کھول کر معاہدہ کیوں منسوخ کیا گیا؟ فیصل واوڈا نے کہا کہ وہ میری ٹائم کے ایسے ثبوت فراہم کریں گے کہ لوگ حیران رہ جائیں گے، اور وہ ثبوت دے رہے ہیں جو ایف آئی اے کو برسوں نہیں ملتے۔

فیصل واوڈا نے مزید بتایا کہ پورٹ قاسم کی 500 ایکڑ زمین 10 لاکھ فی ایکڑ کی قیمت پر دینے کا فیصلہ ستمبر 2024ء میں ہوا، اور پورٹ قاسم کی 365 ایکڑ زمین کی رقم کے بدلے 500 ایکڑ زمین دینے کا فیصلہ کیا گیا۔ انہوں نے یہ بھی کہا کہ پورٹ قاسم کی زمین صرف 8 فیصد دینے کا فیصلہ کیا گیا۔