وفاقی وزیرِ خزانہ محمد اورنگزیب نے یہ امید ظاہر کی ہے کہ موجودہ آئی ایم ایف پروگرام آخری ہوگا۔ انہوں نے کہا کہ پاکستان میں مہنگائی میں نمایاں کمی آئی ہے، جو مئی 2023ء میں 38 فیصد تھی اور اب یہ 3 فیصد تک آ گئی ہے۔ سرکاری خبررساں ادارے اے پی پی کے مطابق، غیرملکی اخبار ‘نکی ایشیا’ کو دیے گئے انٹرویو میں انہوں نے کہا کہ پاکستان کی آئی ایم ایف سے بیل آؤٹ کے بعد کریڈٹ ریٹنگ میں بہتری آئی ہے۔ انہوں نے مزید کہا کہ اقتصادی اصلاحات کی بدولت مہنگائی میں کمی واقع ہوئی ہے اور پاکستان چین کی مالیاتی منڈیوں تک رسائی کے لیے تیار ہے۔ پاکستان کے اپنے یوآن بانڈ چینی مارکیٹ تک رسائی حاصل کرنے کے لیے تیار ہیں، اور رواں مالی سال کے آخر تک پانڈا بانڈ کا ابتدائی اجراء متوقع ہے۔

محمد اورنگزیب نے یہ بھی کہا کہ ہانگ کانگ میں کارپوریٹ سٹاک لسٹنگز کی حوصلہ افزائی کی جائے گی، اور پاک چین مشترکہ منصوبے کی ہانگ کانگ میں لسٹنگ کی توقع ہے۔ انہوں نے مزید کہا کہ پاک چین تعلقات کو مزید مستحکم کرنے کے لیے سی پیک ایک اہم قدم ہے، اور پاکستان میں چینی شہریوں کے لیے سکیورٹی اقدامات جاری ہیں۔ انہوں نے یہ بھی واضح کیا کہ میڈیا میں نظر آنے والی صورتحال سے زمینی صورتحال کہیں بہتر ہے۔

وزیر خزانہ نے کہا کہ آئی ایم ایف کے 25ویں پروگرام کے بعد ترقی کے ماڈل پر توجہ مرکوز کی گئی ہے، اور یہ آخری آئی ایم ایف پروگرام ہوگا۔ برآمدی نمو مستحکم ہے اور غیرملکی سرمایہ کاری میں بھی اضافہ ہو رہا ہے۔