news
اسلام آباد،شہزاد ٹاؤن میں دن دیہاڑے 3 کروڑ روپے لوٹ لیے گئے۔
مسلح ڈاکوؤں نے دن دیہاڑے بینک پر حملہ کیا جس کے نتیجے میں ایک سیکیورٹی گارڈ جاں بحق اور دوسرا شدید زخمی ہوگیا۔
پولیس کے مطابق 17 میل جھنگی سیداں میں الائیڈ بینک برانچ میں تین نامعلوم مسلح ڈاکو آلٹو کار میں آئے۔
بینک کی کیش کلیکشن گاڑی نقدی منتقل کر رہی تھی کہ ڈاکوؤں نے اندھا دھند فائرنگ کر دی۔ فائرنگ سے نجی سیکیورٹی کمپنی کا سیکیورٹی گارڈ سلیمان موقع پر جاں بحق ہوگیا جب کہ دوسرا گارڈ طارق شدید زخمی ہوگیا جسے اسپتال منتقل کردیا گیا۔
پولیس کا کہنا ہے کہ گزشتہ 10 سالوں میں اسلام آباد میں بینک ڈکیتی کی یہ سب سے بڑی واردات ہے۔ اس کے جواب میں اسلام آباد کے انسپکٹر جنرل آف پولیس سید علی ناصر رضوی نے ڈی آئی جی سید علی رضا کی سربراہی میں خصوصی تحقیقاتی ٹیمیں تشکیل دینے کا حکم دیا ہے۔ ٹیموں میں ایس ایس پی آپریشنز، ایس پی آرگنائزڈ کرائم یونٹ اور دیگر متعلقہ ایس پیز شامل ہوں گے۔
آئی جی پی نے اس بات پر زور دیا کہ پولیس ٹیمیں ملزمان کو جلد از جلد گرفتار کرنے کے لیے کام کر رہی ہیں۔