پی آئی اے کا حج آپریشن 2025، پہلی پرواز 29 اپریل کو روانہ ہوگی

قومی ایئرلائن (پی آئی اے) نے حج آپریشن کا اعلان کر دیا ہے، جس کے تحت پہلی پرواز 29 اپریل کو روانہ ہوگی۔ پی آئی اے 280 خصوصی پروازوں کے ذریعے 56 ہزار سے زائد پاکستانی عازمین کو سعودی عرب پہنچائے گی۔ یہ حج آپریشن 29 اپریل سے یکم جون تک جاری رہے گا، اور عازمین کی روانگی کے لیے بوئنگ 777 اور ائربس 320 طیارے استعمال کیے جائیں گے تاکہ سفر کو زیادہ آرام دہ اور منظم بنایا جا سکے۔

ذرائع کے مطابق، اس سال 20 ہزار عازمین سرکاری حج سکیم کے تحت جبکہ 36 ہزار پرائیویٹ اسکیم کے تحت پی آئی اے کی پروازوں سے سفر کریں گے۔ حکام کا کہنا ہے کہ تمام پروازیں وقت پر اور محفوظ طریقے سے مکمل کرنے کے لیے خصوصی انتظامات کیے گئے ہیں، اور عازمین حج کو کسی بھی زحمت سے بچانے کے لیے ہر ممکن سہولت فراہم کی جائے گی۔

پی آئی اے کا بعد از حج آپریشن 12 جون سے شروع ہوگا اور یہ 10 جولائی تک جاری رہے گا، جس دوران واپس آنے والے عازمین حج کو وطن پہنچانے کے لیے فلائٹس کا مربوط نظام ترتیب دیا گیا ہے۔

یہ بھی بتایا گیا ہے کہ پی آئی اے، سعودی ایئر لائن سمیت 5 ایئر لائنز حج آپریشن میں حصہ لیں گی۔ ذرائع کے مطابق، سرکاری سکیم کے تحت تقریباً 89 ہزار پاکستانی عازمین مقدس مقامات کی زیارت کے لیے جائیں گے، جبکہ اس سال ایک لاکھ 79 ہزار 210 پاکستانی عازمین فریضہ حج ادا کریں گے۔