او جی ڈی سی ایل کا ریکوڈک پروجیکٹ میں 627 ملین ڈالر کی سرمایہ کاری کا اعلان

آئل اینڈ گیس ڈیولپمنٹ کمپنی لمیٹڈ (او جی ڈی سی ایل) نے ریکوڈک فزیبلٹی اسٹڈی مکمل کر لی ہے اور اس کے ساتھ ہی 627 ملین ڈالر کی سرمایہ کاری کی تصدیق بھی کر دی ہے۔

او جی ڈی سی ایل کے ترجمان کی جانب سے جاری کردہ بیان میں کہا گیا ہے کہ او جی ڈی سی ایل کا ریکوڈک مائننگ پروجیکٹ میں 5.6 ارب ڈالر کی سرمایہ کاری میں 8.33 فیصد حصہ ہوگا۔ او جی ڈی سی ایل کے بورڈ نے ریکوڈک کے لیے مالیاتی انتظامات کی منظوری بھی دے دی ہے۔

ترجمان نے مزید بتایا کہ ریکوڈک پروجیکٹ سے 13.1 ملین ٹن تانبہ اور 17.9 ملین اونس سونے کی پیداوار کی توقع ہے، اور اس پروجیکٹ کے پہلے مرحلے میں 2028 سے سالانہ 45 ملین ٹن پروسیسنگ کا آغاز ہوگا۔

بیان میں یہ بھی کہا گیا کہ ریکوڈک کے پہلے مرحلے کی ترقی کے لیے 3 ارب ڈالر کی سرمایہ کاری کی منظوری دی گئی ہے، اور ریکوڈک فزیبلٹی اسٹڈی کے اعلان کے بعد پاکستان اسٹاک ایکسچینج میں او جی ڈی سی کے شیئرز میں 2.76 فیصد اضافہ ہوا ہے۔

او جی ڈی سی ایل کے ترجمان نے یہ بھی کہا کہ ریکوڈک پروجیکٹ آئندہ 37 سالوں کے دوران تانبے اور سونے کی پیداوار میں اضافہ کرے گا، اور او جی ڈی سی ایل، پی پی ایل، جی ایچ پی ایل (GHPL)، بیرک گولڈ اور بلوچستان حکومت اس میگا پروجیکٹ میں شراکت دار ہیں۔

بیان میں یہ بھی شامل ہے کہ ریکوڈک کے دوسرے مرحلے میں 2034 سے پروسیسنگ کی صلاحیت کو 90 ملین ٹن سالانہ تک بڑھایا جائے گا۔