news
وزیراعظم شہباز شریف کی مسجد نبویؐ میں حاضری، سعودی ولی عہد سے ملاقات
وزیراعظم محمد شہباز شریف نے اپنے وفد کے ساتھ مسجد نبوی صلی اللہ علیہ وسلم کی زیارت کی اور ریاض الجنة میں نفل نماز ادا کی۔ خاص طور پر ان کے لیے ریاض الجنہ کے دروازے کھولے گئے، جہاں انہوں نے روضہ رسول صلی اللہ علیہ وسلم کی زیارت کا شرف حاصل کیا۔ اس موقع پر وزیراعظم نے امت مسلمہ کی اتحاد و یگانگت اور پاکستان کی ترقی و خوشحالی کے لیے دعا کی۔
وزیراعظم شہباز شریف اس وقت سعودی عرب میں چار روزہ دورے پر ہیں۔ وہ وفد کے ہمراہ مدینہ منورہ پہنچے، جہاں گورنر مدینہ، عزت مآب شہزادہ سلمان بن سلطان نے ان کا ایئرپورٹ پر استقبال کیا۔ وزیراعظم نے گزشتہ روز جدہ میں سعودی ولی عہد محمد بن سلمان سے بھی ملاقات کی تھی۔
یاد رہے کہ اس ملاقات کے دوران آرمی چیف جنرل عاصم منیر، نائب وزیراعظم اسحاق ڈار، اور وزیراعلیٰ پنجاب مریم نواز بھی موجود تھے۔ وزیراعظم اور سعودی ولی عہد کے درمیان ملاقات میں علاقائی اور بین الاقوامی صورتحال پر بھی بات چیت ہوئی، اور دونوں رہنماوں نے پاک سعودی عسکری تعاون کو فروغ دینے کے حوالے سے بھی گفتگو کی۔ اس ملاقات میں دو طرفہ تعلقات اور باہمی دلچسپی کے امور پر بھی تبادلہ خیال کیا گیا۔