news
جعفر ایکسپریس حملے کا مقدمہ درج، سیکیورٹی سخت کردی گئی
صوبہ بلوچستان کے علاقے بولان میں جعفر ایکسپریس پر ہونے والے حملے کا مقدمہ کئی دن گزرنے کے بعد نامعلوم دہشتگردوں کے خلاف درج کر لیا گیا ہے۔ تفصیلات کے مطابق، یہ مقدمہ تھانہ نصیر آباد میں درج ہوا ہے، جس میں سی ٹی ڈی حکام نے مدعیت کی۔ ایف آئی آر میں کہا گیا ہے کہ 11 مارچ کو جعفرآباد ایکسپریس پر نامعلوم دہشت گردوں نے حملہ کیا، جس میں انہوں نے ٹرین اور مسافروں پر اسلحہ اور راکٹ لانچر سے حملہ کیا۔ یہ ٹرین 11 بوگیوں پر مشتمل تھی اور اس میں بڑی تعداد میں مسافر موجود تھے۔
دوسری جانب، جعفر ایکسپریس کی بوگیاں کوئٹہ پہنچ چکی ہیں۔ پولیس حکام کا کہنا ہے کہ اس دہشت گردی کے واقعے سے متاثرہ بوگیوں سے 3 دستی بم برآمد ہوئے ہیں۔ کوئٹہ ریلوے سٹیشن کے قریب لوکوشیڈ پر کھڑی ٹرین کی بوگیوں سے ملنے والے دھماکہ خیز مواد کو ناکارہ بنا دیا گیا ہے، جبکہ جعفر ایکسپریس کی بوگیوں کی مرمت کا کام بھی جاری ہے۔ ٹرین کی کل 8 بوگیاں کوئٹہ ریلوے سٹیشن لائی گئی ہیں، اور اس حملے میں جعفر ایکسپریس کی 5 بوگیاں متاثر ہوئیں۔ متاثرہ بوگیوں کو کچھی کے علاقے مشکاف سے کوئٹہ منتقل کیا گیا ہے۔
بتایا جا رہا ہے کہ جعفر ایکسپریس پر حملے کے بعد ریلوے ٹریک کی مرمت کا کام بھی شروع کر دیا گیا ہے۔