پاکستان میں سرمایہ کاری کے وسیع مواقع، وزیراعظم کی سعودی سرمایہ کاروں کو دعوت

وزیراعظم محمد شہباز شریف نے سعودی سرمایہ کاروں کو سہولت فراہم کرنے کے عزم کا اعادہ کرتے ہوئے پاکستان میں توانائی، انفراسٹرکچر، زراعت اور ٹیکنالوجی جیسے مختلف شعبوں میں خصوصی سرمایہ کاری سہولت کونسل کے تحت کاروباری مواقع سے فائدہ اٹھانے کی دعوت دی۔ وزیراعظم آفس کے میڈیا ونگ کی جانب سے جاری کردہ بیان کے مطابق، وزیراعظم نے سعودی وزیر سرمایہ کاری خالد الفالح اور جوائنٹ ٹاسک فورس برائے اقتصادی مصروفیات کے سربراہ محمد التویجری سے ملاقات کی۔ اس ملاقات میں اقتصادی تعاون کو مزید مستحکم کرنے، پاکستان میں سعودی سرمایہ کاری کو بڑھانے، اور اہم شعبوں میں مشترکہ اقدامات کو تیز کرنے پر بات چیت کی گئی۔

ملاقات کے دوران، وزیراعظم نے سعودی سرمایہ کاروں کو سہولت فراہم کرنے کے لیے پاکستان کے عزم کو دوبارہ واضح کیا اور پاکستان کی سٹریٹجک پوزیشن اور سرمایہ کار دوست پالیسیوں پر روشنی ڈالی۔ انہوں نے توانائی، انفراسٹرکچر، زراعت اور ٹیکنالوجی میں پاکستان کی وسیع صلاحیت کا ذکر کرتے ہوئے سعودی کاروباری اداروں کو خصوصی سرمایہ کاری سہولت کونسل (ایس آئی ایف سی) کے تحت کاروباری مواقع تلاش کرنے کی دعوت دی۔

اس موقع پر سعودی وزیر خالد الفالح اور ٹاسک فورس کے سربراہ محمد التویجری نے پاکستان کے ساتھ اقتصادی تعلقات کو مزید گہرا کرنے میں سعودی عرب کی دلچسپی کا اظہار کیا۔