news
سائفر کیس: عمران خان اور شاہ محمود قریشی بری، اسلام آباد ہائیکورٹ کا تحریری فیصلہ
سائفر کیس میں استغاثہ بانی پی ٹی آئی عمران خان اور سابق وزیر خارجہ شاہ محمود قریشی کے خلاف اپنا کیس ثابت کرنے میں ناکام رہا۔ اسلام آباد ہائیکورٹ نے عمران خان اور شاہ محمود قریشی کی بریت کا تحریری فیصلہ جاری کر دیا۔ عدالت نے اپنے فیصلے میں کہا کہ اگر ہم جرح کو ایک طرف رکھ بھی دیں، تو بھی استغاثہ کے شواہد اس کیس کو ثابت کرنے کے لیے ناکافی ہیں۔
استغاثہ مکمل طور پر اپنے کیس میں ناکام رہی ہے۔ عدالتی فیصلے میں یہ بھی کہا گیا ہے کہ ریکارڈ یہ ظاہر کرتا ہے کہ ٹرائل میں غیر ضروری جلد بازی کی گئی۔ جب ملزمان کے وکلا نے التوا مانگا تو سرکاری وکیل کو مقرر کیا گیا، جسے تیاری کے لیے صرف ایک دن دیا گیا۔
فیصلے میں مزید یہ بھی کہا گیا کہ سرکاری وکیل کی جرح ان کی ناتجربہ کاری اور وقت کی کمی کو ظاہر کرتی ہے۔
یہ کیس ٹرائل کورٹ کو واپس بھیجنے کی نوعیت کا ہے، اور عدالت اس کیس کو میرٹ پر سن رہی ہے۔ اس سے پہلے، اسلام آباد ہائیکورٹ نے 3 جون 2024 کو عمران خان اور شاہ محمود قریشی کی سزا کو کالعدم قرار دیا تھا۔ اسلام آباد ہائیکورٹ کے سابق چیف جسٹس عامر فاروق اور جسٹس میاں گل حسن اورنگزیب نے عمران خان اور شاہ محمود قریشی کی بریت کی درخواستوں پر اپنا فیصلہ سنایا تھا۔