news
جعفر ایکسپریس حملے کے دہشت گردوں کی تصاویر جاری، غیر ملکی اسلحہ برآمد
پشاور جانے والی جعفر ایکسپریس پر بولان کے قریب پہاڑی علاقے میں مسافر ٹرین پر حملہ کرنے والے دہشتگردوں کی تصاویر اب منظر عام پر آ گئی ہیں۔ میڈیا رپورٹس کے مطابق، سیکیورٹی ذرائع نے بتایا کہ 12 مارچ کو فائنل کلیئرنس آپریشن کے دوران مارے جانے والے دہشت گرد غیر ملکی اسلحہ سے لیس تھے۔ ان تصاویر میں دیکھا جا سکتا ہے کہ یہ دہشت گرد ٹرین کے ارد گرد ہلاک ہوئے۔
سیکیورٹی ذرائع نے مزید یہ بھی بتایا کہ یہ دہشت گرد بیرون ملک اپنے آلہ کاروں سے رابطے میں تھے اور مسلسل ہدایات حاصل کر رہے تھے۔ سیکیورٹی فورسز نے بلوچستان میں ایک کامیاب ریسکیو آپریشن کے دوران جعفر ایکسپریس کو یرغمال بنانے والے تمام دہشت گردوں کو ہلاک کر دیا۔
اس سے پہلے، پاک فوج کے شعبہ تعلقات عامہ (آئی ایس پی آر) کے ڈی جی، لیفٹیننٹ جنرل احمد شریف چوہدری نے اس واقعے کے بارے میں بتایا کہ دہشت گردوں نے 11 مارچ کو تقریباً ایک بجے بولان کے علاقے اوسی پور میں ریلوے ٹریک کو دھماکے سے اڑا دیا اور جعفر ایکسپریس کو روک دیا۔
بازیابی کا آپریشن فوراً شروع کیا گیا، جس میں آرمی، ایئرفورس، فرنٹئیر کور اور ایس ایس جی کے جوانوں نے حصہ لیا اور یرغمالیوں کو مرحلہ وار رہا کروا لیا۔ ریلوے حکام کے مطابق، اس ٹرین میں 440 افراد سوار تھے۔