آئی ایم ایف کا بجلی بلوں پر جی ایس ٹی ختم کرنے اور ریلیف پیکیج میں توسیع سے انکار

آئی ایم ایف نے بجلی صارفین کے لیے قیمتوں میں کمی کے حوالے سے بجلی بلوں پر جی ایس ٹی ختم کرنے کی تجویز کو مسترد کر دیا ہے۔ عالمی مالیاتی فنڈ نے اقتصادی جائزہ مذاکرات کے دوران صنعتی اور زرعی شعبے کے لیے موسم سرما کے ریلیف پیکیج کو پورے مالی سال تک توسیع دینے کی اجازت دینے سے بھی انکار کر دیا۔ میڈیا رپورٹس کے مطابق، پاکستان اور آئی ایم ایف کے درمیان توانائی کے شعبے میں گردشی قرضے میں کمی کے لیے مذاکرات جاری ہیں۔

آئی ایم ایف کو بریفنگ کے دوران بتایا گیا کہ اگلے بجٹ میں تنخواہ دار طبقے پر ٹیکسوں کا بوجھ کم کرنے اور رئیل اسٹیٹ، پراپرٹی، مشروبات اور تمباکو کے شعبوں کو ریلیف دینے کی تجویز دی گئی ہے۔ آئی ایم ایف کی منظوری سے ان شعبوں پر ٹیکس کا بوجھ کم کیا جائے گا۔

پاکستان کے دورے پر آئے عالمی مالیاتی فنڈ کے وفد کو بریفنگ دیتے ہوئے یہ بھی بتایا گیا کہ گردشی قرضے پر قابو پانے کے لیے کمرشل بینکوں سے 1250 ارب روپے کا قرض لیا جائے گا، جس پر 10.8 فیصد شرح سود طے پائی ہے۔

تاجر دوست سکیم اور کمپلائنس رسک مینجمنٹ جیسے انتظامی اقدامات کے ذریعے ٹیکس جمع کیا جائے گا۔ ریٹیل سمیت مختلف شعبوں سے 250 ارب روپے کی ٹیکس وصولی کا منصوبہ بھی بنایا گیا ہے۔ یہ بھی بتایا گیا ہے کہ ان تمام اقدامات کی حتمی منظوری آئی ایم ایف سے لی جائے گی۔ خیال رہے کہ اس سے قبل وزیراعظم شہباز شریف نے بھی اس معاملے پر بات کی تھی۔