ٹک ٹاک کا یوٹیوب سے مقابلہ، ڈیسک ٹاپ ورژن میں نئے فیچرز متعارف

اسٹریمنگ ویب سائٹ یوٹیوب کے مقابلے کے لیے شارٹ ویڈیو ایپلی کیشن ٹک ٹاک نے اپنے ڈیسک ٹاپ ورژن میں کئی نئے فیچرز متعارف کرائے ہیں۔

دنیا بھر میں ٹک ٹاک کو ایک موبائل فرسٹ پلیٹ فارم کے طور پر جانا جاتا ہے، جہاں ایک ارب سے زائد لوگ تفریح اور تخلیقی صلاحیتوں کو سیکھنے کے لیے اس کا استعمال کرتے ہیں۔

ٹک ٹاک کی جانب سے جاری کردہ بیان کے مطابق، ڈیسک ٹاپ ورژن کو مزید بہتر بنانے کے لیے مختلف فیچرز پیش کیے گئے ہیں، جن تک صارفین کو مرحلہ وار رسائی فراہم کی جائے گی۔

اس بارے میں ٹک ٹاک انتظامیہ کا کہنا ہے کہ ہم اپنے صارفین کی بدلتی ہوئی ضروریات کو پورا کرنے اور ٹک ٹاک کے تجربے کو بہتر بنانے کے نئے طریقے تلاش کر رہے ہیں، اس لیے ہم سمجھتے ہیں کہ بعض اوقات ڈیسک ٹاپ پر ویڈیوز دیکھنا زیادہ آسان ہو سکتا ہے۔

بیان میں یہ بھی کہا گیا ہے کہ اب ڈیسک ٹاپ ورژن میں ایکسپلور کا ٹیب شامل ہوگا، جبکہ فار یو ٹیب کو بھی مزید بہتر بنایا گیا ہے۔ اسی طرح، ٹک ٹاک کے ڈیسک ٹاپ ورژن میں گیم کی لائیو اسٹریم بھی دیکھی جا سکے گی، جو کہ یوٹیوب پر ایک مقبول فیچر ہے۔

ابتدائی طور پر ٹک ٹاک پر صرف ایک منٹ دورانیے کی ویڈیوز اپ لوڈ کرنے کی اجازت تھی، لیکن بعد میں اس دورانیے کو بڑھا دیا گیا، اور اب ممکنہ طور پر جلد ہی تمام صارفین کو 60 منٹ دورانیے کی ویڈیوز اپ لوڈ کرنے کی سہولت بھی ملے گی۔