دہشتگردی کیخلاف متحد ہونا ہوگا، وزیراعلیٰ خیبرپختونخوا

وزیراعلیٰ خیبرپختونخوا علی امین گنڈاپور نے کہا ہے کہ اگر دہشتگردی کے خلاف بروقت اقدامات نہ کیے گئے تو یہ پورے ملک کو اپنی لپیٹ میں لے سکتی ہے۔ انہوں نے اس بات پر زور دیا کہ دہشتگردی کے خاتمے کے لیے سب کو متحد ہونا ہوگا اور اس مسئلے کا پائیدار حل مذاکرات ہی ہیں۔ تفصیلات کے مطابق، وزیر اعلیٰ علی امین خان گنڈاپور کی دارلعلوم حقانیہ اکوڑہ خٹک آمد کے موقع پر مشیر اطلاعات بیرسٹر محمد علی سیف بھی ان کے ہمراہ تھے۔ وزیراعلیٰ نے گذشتہ روز دھماکے میں شہید مولانا حامد الحق کے لواحقین سے تعزیت کی اور اس موقع پر مولانا حامد الحق اور دیگر شہداء کے درجات کی بلندی کے لیے دعا کی گئی۔ انہوں نے دھماکے سے متاثرہ مسجد کا بھی دورہ کیا۔

یہ واقعہ انتہائی افسوسناک اور قابل مذمت ہے، مولانا حامد الحق کی شہادت ایک ناقابل تلافی نقصان ہے، اور ان کی دینی اور سیاسی خدمات کو ہمیشہ یاد رکھا جائے گا۔ دارالعلوم حقانیہ نے دین اسلام کی خدمت میں اہم کردار ادا کیا ہے۔ علی امین گنڈاپور نے مزید کہا کہ واقعے کی تحقیقات کے لیے جوائنٹ انوسٹی گیشن ٹیم تشکیل دی جا رہی ہے، اور اس گھناؤنے فعل کے مرتکب افراد کی نشاندہی اور انہیں کیفر کردار تک پہنچانے کے لیے ہر ممکن اقدامات کیے جائیں گے۔ اگلے چند روز میں جے آئی ٹی کا اعلامیہ جاری کیا جائے گا۔