news
سائنس دانوں کا انقلابی اقدام : 24 گھنٹے تک تازہ رہنے والا پھل
سائنس دانوں نے ایک ایسا کیلا تیار کیا ہے جو چھیلے جانے کے بعد خراب نہیں ہوتا۔
برطانوی ماہرین نے اس کیلے کی جینیات میں تبدیلی کی ہے، جس کی بدولت یہ پھل چھیلے جانے کے بعد 24 گھنٹوں تک تازہ اور پیلا رہتا ہے۔
ناروچ کی ایک مقامی بائیو ٹیک کمپنی، جس نے یہ کامیابی حاصل کی، کے چیف ایگزیکٹیو گِلڈ گرشون نے بتایا کہ ان کا تیار کردہ کیلا چھیلے جانے اور کاٹے جانے کے کم از کم 12 گھنٹوں تک اور 24 گھنٹوں کے بعد 30 فیصد سے کم خراب ہوتا ہے۔
انہوں نے مزید کہا کہ ان کیلوں کا ذائقہ، خوشبو، مٹھاس اور شکل بالکل عام کیلے کی طرح ہے، لیکن فرق یہ ہے کہ اس کا گودہ جلدی خراب نہیں ہوتا۔
کمپنی نے پولی فینول آکسیڈیز نامی خامروں کو غیر فعال کر کے اس کی عمر میں اضافہ کیا ہے، جو کیلوں کے خراب ہونے کا سبب بنتے ہیں۔
کمپنی ٹراپک کے پاس فلپائن، کولمبیا، ہونڈرس، امریکا اور کینیڈا میں کیلے فروخت کرنے کی اجازت ہے، جہاں وہ رواں ماہ میں اپنی لانچنگ شروع کرنے والی ہے۔