news
پاکستان اور تاجکستان کے تجارتی تعلقات میں پیشرفت
اسلام آباد:
تاجکستان نے گوادر اور کراچی کی بندرگاہوں کے استعمال، لاجسٹک مسائل کے حل اور پاکستان سے براہ راست پروازوں کی درخواست کی ہے۔
ایکسپریس نیوز کے مطابق، وفاقی وزیر برائے قومی غذائی تحفظ رانا تنویر حسین نے تاجک سفیر سے ملاقات کی اور دو طرفہ تجارتی تعلقات پر اہم گفتگو کی۔
رانا تنویر حسین نے کہا کہ پاکستان اور تاجکستان کے تعلقات مضبوط ہیں اور ہم تجارتی روابط کو مزید بڑھانے کے لیے کوشاں ہیں۔ تاجک سفیر نے گوادر اور کراچی کی بندرگاہوں کے استعمال میں دلچسپی ظاہر کی اور لاجسٹک مسائل کے حل کی درخواست کی۔
رانا تنویر حسین نے یہ بھی کہا کہ ہم برادر ملک تاجکستان کے مسائل کے حل کے لیے ہر ممکن کوشش کریں گے۔ تاجکستان کی جانب سے پاکستانی مصنوعات میں دلچسپی خوش آئند ہے، اور تاجکستان کی طرف سے پاکستان میں تجارتی نمائش کی تجویز پر بھی غور کیا جا رہا ہے۔
وفاقی وزیر نے تاجکستان کے ساتھ فری ٹریڈ ایگریمنٹ (ایف ٹی اے) پر بھی بات چیت کی۔ اس دوران، رانا تنویر حسین اور تاجک سفیر کے درمیان چینی برآمدات کے حوالے سے بھی گفتگو ہوئی۔
تاجک سفیر نے کہا کہ پاکستان اور تاجکستان کے درمیان براہ راست پروازوں کی ضرورت ہے۔ اس پر وفاقی وزیر نے یقین دلایا کہ ہم تاجکستان کے لیے ہر ممکن سہولت فراہم کریں گے۔