news
ٹرانسپورٹ مافیا کا گٹھ جوڑ، خوردنی تیل کی قیمتوں میں اضافے کا اسکینڈل، مسابقتی کمیشن کا چھاپہ
اسلام آباد:
ملک میں ٹرانسپورٹ مافیا کے گٹھ جوڑ کی وجہ سے خوردنی تیل کی قیمتوں میں اضافے کا ایک بڑا اسکینڈل سامنے آیا ہے۔ مسابقتی کمیشن آف پاکستان نے آئل ٹینکرز ایسوسی ایشن کے دفتر پر چھاپہ مار کر وہاں کا تمام ریکارڈ قبضے میں لے لیا۔
مسابقتی کمیشن کے حکام کے مطابق، آئل ٹینکرز ایسوسی ایشن کے دفتر میں آپریشن کے دوران اہم دستاویزات اور ڈیجیٹل ریکارڈ ضبط کیے گئے ہیں، کیونکہ خوردنی تیل کے کرایوں میں ٹرانسپورٹ مافیا کے مبینہ گٹھ جوڑ کا انکشاف ہوا ہے۔
انہوں نے مزید بتایا کہ ٹرانسپورٹرز ایسوسی ایشن کے خلاف انکوائری آخری مراحل میں ہے اور چھاپے کے دوران آئل ٹینکرز ایسوسی ایشن کی جانب سے کرایے مقرر کرنے اور بڑھانے کے ٹھوس شواہد ملے ہیں۔
حکام کا کہنا ہے کہ توقع ہے کہ مسابقتی کمیشن آف پاکستان جلد ہی ایک آرڈر پاس کرے گا، جس میں آئل ٹینکرز ایسوسی ایشن اور گٹھ جوڑ میں ملوث افراد پر بھاری جرمانے عائد کیے جائیں گے۔
حکام کے مطابق، گڈز ٹرانسپورٹرز ایسوسی ایشن نے مبینہ طور پر کرایے طے کر رکھے ہیں، حالانکہ قیمتوں کو گٹھ جوڑ کے ذریعے طے کرنا صارفین کے حقوق کے خلاف ہے۔
مسابقتی کمیشن نے تنظیموں کو متنبہ کیا ہے کہ مارکیٹ میں آزادانہ مسابقت کو یقینی بنایا جائے۔