news
ریشم کی دیرینہ خواہش: لنگر خانہ بنوانے کا خواب
پاکستان شوبز کی سینئر اداکارہ ریشم نے اپنی ایک دیرینہ خواہش کا اظہار کیا ہے۔
حال ہی میں ریشم ایک نجی ٹی وی کے پروگرام میں شریک ہوئیں، جہاں انہوں نے شوبز اور اپنی نجی زندگی کے مختلف پہلوؤں پر بات چیت کی۔
اداکارہ نے اپنی ایک خواہش کا ذکر کرتے ہوئے اسے اپنا خواب قرار دیا۔ ریشم نے کہا کہ وہ چاہتی ہیں کہ وہ پیسے جمع کر کے ایک لنگر خانہ بنوائیں۔
انہوں نے اپنے چاہنے والوں سے دعا کرنے کی درخواست کی اور کہا کہ یہ ان کا خواب ہے کہ وہ ایک مخصوص جگہ خرید کر ایک باقاعدہ لنگر خانہ قائم کریں، جو ان کی وفات کے بعد بھی چلتا رہے اور ان کے لیے صدقہ جاریہ بن جائے۔
اداکارہ کی یہ ویڈیو کلپ سوشل میڈیا پر وائرل ہو رہی ہے، جس پر صارفین ان کی غریبوں کی مدد کرنے کی خواہش کی تعریف کر رہے ہیں اور ان کے لیے نیک تمناؤں کا اظہار کر رہے ہیں۔
یاد رہے کہ ریشم اکثر اپنے گھر میں خود لنگر کا کھانا بنا کر مستحق افراد میں تقسیم کرتی ہیں، جس کی کئی ویڈیوز سوشل میڈیا پر وائرل ہو چکی ہیں۔ اداکارہ کا کہنا ہے کہ انہیں لنگر کر کے اور لوگوں کی مدد کر کے سکون اور دل کو راحت ملتی ہے۔