news
مصطفی عامر قتل کیس: ملزم ارمغان کا منشیات نیٹ ورک سے تعلق؟
کراچی کے علاقے ڈیفنس میں اغوا کے بعد قتل ہونے والے مصطفی عامر کیس میں گرفتار ملزم ارمغان کے منشیات کے عالمی نیٹ ورک میں شامل بڑے ناموں کی تفصیلات جاننے کے لیے خصوصی تحقیقاتی ٹیم نے ڈی جی اینٹی نارکوٹکس کو خط لکھنے کا فیصلہ کیا ہے۔ تحقیقات کے مطابق، ارمغان نے بھاری اور غیر ممنوعہ بور کا اسلحہ کہاں سے خریدا اور اس کی خریداری کی وجوہات جاننے کے لیے تحقیقات کو مزید وسعت دی جائے گی۔
ذرائع کے مطابق، اینٹی نارکوٹکس ارمغان اور ساحر حسن کے ساتھ منشیات کی خرید و فروخت میں ملوث اہم افراد کی معلومات حاصل کرے گی، جبکہ دوسرے مرحلے میں ارمغان اور ساحر کی تفتیش کے دوران سامنے آنے والے بڑے ناموں کی گرفتاری بھی عمل میں لائی جائے گی۔
دوسری جانب، ارمغان کے گھر سے ملنے والے اسلحے کی فارنزک جانچ بھی کی جائے گی۔ تحقیقاتی ذرائع نے بتایا کہ ارمغان نے یہ اسلحہ کہاں سے خریدا اور اس کا استعمال کس مقصد کے لیے ہونا تھا، اس پہلو سے بھی تحقیقات کی جائیں گی۔