news
سپیکر قومی اسمبلی ایاز صادق کا ہنگری میں اہم بیان، مسئلہ کشمیر اور فلسطین پر عالمی کردار کی اہمیت
سپیکر قومی اسمبلی سردار ایاز صادق نے کہا ہے کہ پاکستان اپنی اصولی اور غیر جانبدار خارجہ پالیسی پر قائم ہے۔ انہوں نے عالمی برادری سے اپیل کی کہ مسئلہ کشمیر اور فلسطین کے پرامن حل میں اپنا کردار ادا کرے، اور یہ کہ یوکرین تنازعہ کا جلد از جلد پرامن حل نکالنا چاہیے۔ یہ خیالات انہوں نے ہنگری کے دورے کے دوران صدر تماس سلیوک سے ملاقات میں پیش کیے۔ ملاقات کے دوران، سپیکر نے اقوام متحدہ کی سلامتی کونسل کے انتخابات میں ہنگری کی جانب سے پاکستان کی حمایت پر شکریہ ادا کیا اور اس حمایت کو ہنگری کی طرف سے پاکستان کی غیر جانبدار اور متوازن خارجہ پالیسی کا اعتراف قرار دیا۔
انہوں نے عالمی پارلیمانی برادری کی ذمہ داری پر زور دیا کہ وہ کشمیری اور فلسطینی عوام کی خواہشات کے مطابق مسئلہ کشمیر اور فلسطین کے پرامن حل میں اپنا کردار ادا کرے۔ دونوں راہنماﺅں نے یوکرین جنگ کے بعد یورپ کی صورتحال پر بھی تبادلہ خیال کیا اور عالمی امن و استحکام کے لیے یوکرین جنگ کے جلد پرامن حل کی خواہش کا اظہار کیا۔ سپیکر قومی اسمبلی نے ہنگری کی جانب سے پاکستانی طلبا کے لیے سالانہ 500 سکالرشپس کی فراہمی کے اقدام کی تعریف کی۔