وفاقی کابینہ میں توسیع، مزید وزراء نے حلف اٹھا لیا

وفاقی کابینہ میں توسیع کے بعد مزید ارکان نے حلف اٹھا لیا ہے، جبکہ کوشش کے باوجود پیپلز پارٹی وفاقی کابینہ کا حصہ نہیں بن سکی۔ وزیر اعظم کے تین مشیروں توقیر شاہ، پرویز خٹک، اور محمد علی کے ساتھ ساتھ چار معاونین خصوصی کی بھی تقرری کی گئی ہے۔ معاونین خصوصی میں ہارون اختر، حذیفہ رحمن، مبارک زیب، اور طلحہ برکی شامل ہیں۔ جمعرات کو ایوان صدر میں حلف برداری کی تقریب منعقد ہوئی، جہاں صدر مملکت نے پہلے مرحلے میں 12 وفاقی وزراء سے حلف لیا۔ وفاقی وزراء میں سردار محمد یوسف، محمد حنیف عباسی، معین وٹو، مصطفیٰ کمال، اورنگزیب کچھی، رانا مبشر، رضا حیات ہراج، طارق فضل چوہدری، علی پرویز ملک، شزا فاطمہ، جنید انور، اور خالد مگسی شامل ہیں۔ صدر مملکت نے دوسرے مرحلے میں 9 وزراء مملکت سے حلف لیا، جن میں طلال چوہدری، بیرسٹر عقیل ملک، ملک رشید، کھیل داس کوہستانی، عبدالرحمان کانجو، بلال اظہر کیانی، مختار بھرت، عون چوہدری، اور وجیہہ قمر شامل ہیں۔ کابینہ ڈویژن نے بارہ نئے وفاقی وزراء اور 9 وزرائے مملکت، تین مشیروں اور چار معاونین خصوصی کی تقرری کے باضابطہ نوٹیفکیشن جاری کر دیے ہیں۔ علاوہ ازیں، ایک وفاقی وزیر پیر عمران شاہ اور دو وزرائے مملکت شذرہ منصب اور ارمغان سبحانی اسلام آباد میں ٹریفک جام ہونے کی وجہ سے حلف برداری کی تقریب میں نہیں پہنچ سکے، جس کی وجہ سے ان کا نوٹیفکیشن جاری نہیں ہوا۔