news
روہت شرما کی فٹنس پر سوالیہ نشان – نیوزی لینڈ کے خلاف میچ سے قبل نیٹ پریکٹس سے گریز
بھارتی کرکٹ ٹیم کے کپتان روہت شرما نے نیوزی لینڈ کے خلاف چیمپئنز ٹرافی 2025ء کے میچ سے پہلے نیٹ پریکٹس میں حصہ نہیں لیا، جس کی وجہ سے ان کی فٹنس کے بارے میں تشویش بڑھ گئی ہے۔
پاکستان کے خلاف میچ میں روہت شرما کو ہیمسٹرنگ میں تکلیف محسوس ہوئی تھی، لیکن میچ کے بعد انہوں نے کہا تھا کہ وہ ٹھیک ہیں اور کوئی فکر کی بات نہیں۔
بھارتی میڈیا کی حالیہ رپورٹس کے مطابق کپتان روہت شرما نے پریکٹس سیشن کے دوران سخت جسمانی سرگرمیوں سے پرہیز کیا اور صرف ہلکی دوڑ اور شیڈو بیٹنگ کی۔
روہت شرما نے سنچری میکر ویرات کوہلی کے بارے میں کیا کہا؟
یہ احتیاطی تدابیر اس لیے اختیار کی گئیں تاکہ ان کی چوٹ مزید نہ بڑھے اور وہ نیوزی لینڈ کے خلاف میچ کے لیے مکمل طور پر فٹ رہیں۔
ٹیم مینجمنٹ اور میڈیکل اسٹاف روہت شرما کی فٹنس پر گہری نظر رکھے ہوئے ہیں اور ان کی شرکت کا حتمی فیصلہ میچ سے پہلے ان کی حالت کے جائزے کے بعد کیا جائے گا۔
دوسری جانب ویرات کوہلی نے پریکٹس سیشن میں اسپنرز کے خلاف بیٹنگ کی مشق کی جبکہ محمد شامی نے مکمل رفتار سے بولنگ کی، جس سے ظاہر ہوتا ہے کہ وہ بھی نیوزی لینڈ کے خلاف میچ کے لیے تیار ہیں۔
شائقین اور ٹیم یہ امید کر رہے ہیں کہ روہت شرما جلد صحت یاب ہو کر میدان میں واپس آئیں گے اور اپنی قائدانہ صلاحیتوں سے ٹیم کو کامیابی کی راہ پر گامزن کریں گے۔