شاہد خاقان عباسی کا آئین کی بالادستی اور حکومت کے اقدامات پر شدید ردعمل

عوام پاکستان پارٹی کے رہنما شاہد خاقان عباسی نے کہا ہے کہ ہم ملک میں آئین کی بالادستی کی بات کر رہے ہیں، جبکہ چوری کے ذریعے حکومت میں آنے والے آئین سے ڈرتے ہیں۔ یہ لوگ ایک بھی کانفرنس سے خوفزدہ ہیں، اور اب یہ کانفرنس جہاں بھی ہو، ضرور ہوگی۔ اسلام آباد میں تحریک تحفظ آئین پاکستان کے رہنماؤں کے ساتھ پریس کانفرنس کرتے ہوئے انہوں نے کہا کہ کانفرنسوں کے ذریعے ملک میں انتشار ختم ہوتا ہے۔
ہم آئین کے حوالے سے کھل کر بات کریں گے۔ قانون کی حکمرانی اور ترقی کے موضوعات پر گفتگو کی جائے گی۔ ہم نے پریس کانفرنس کے لیے ہال بک کروایا، لیکن وہاں ہمیں اجازت نہیں دی گئی۔ اس کے بعد ہم نے ایک اور مارکی میں انتظام کیا، لیکن ہمیں وہاں بھی نہیں چھوڑا گیا۔ یہ کوئی جلسہ نہیں تھا، بلکہ یہ ایک کانفرنس تھی۔

ہم نے اپنی پریس کانفرنس میں میڈیا، دانشوروں اور وکلا کو دعوت دی تھی۔ اس موقع پر گفتگو کرتے ہوئے تحریک تحفظ آئین پاکستان کے سربراہ محمود خان اچکزئی نے کہا کہ ہم دوبارہ فارم 45 والوں کی اسمبلی بلائیں گے۔ ہم پھر پیکا ایکٹ اور 26 ویں ترمیم کو ختم کریں گے۔ یہ حکمران ناجائز ہیں، اور اگر ہمیں مجبور کیا گیا تو ہم اسمبلی کی کارروائی نہیں کرنے دیں گے۔ انہوں نے کہا کہ چاہے کسی کو یہ پسند آئے یا نہ آئے، ہمیں یہ روایات توڑنی ہیں۔