وزیراعظم شہبازشریف نے وفاقی کابینہ میں توسیع کا فیصلہ کیا ہے۔ میڈیا رپورٹس کے مطابق، مسلم لیگ ن کے رکن اسمبلی حنیف عباسی اور طارق فضل چوہدری کو کابینہ میں شامل کرنے کا فیصلہ کیا گیا ہے۔ ایم کیوایم کے رہنما مصطفی کمال اور خالد مگسی کو بھی وفاقی کابینہ میں شامل کرنے کا ارادہ ہے۔
نئے وزراء کی حلف برداری کی تقریب 27 فروری کو متوقع ہے۔ حنیف عباسی کو وزارت ریلوے، طارق فضل چوہدری کو وزارت قومی صحت، مصطفی کمال کو سائنس اینڈ ٹیکنالوجی اور خالد مگسی کو وزارت مواصلات کا قلمدان سونپے جانے کی امید ہے۔
دوسری جانب، صدر مملکت آصف زرداری سے ملاقات میں پیپلزپارٹی کے پارلیمانی وفد نے حکومت کے خلاف شکایات کا انبار لگا دیا۔

سماء نیوز کے مطابق، صدر آصف زرداری سے لاہور میں پیپلزپارٹی کے پارلیمانی رہنماؤں نے ملاقات کی، جس میں سیاسی اور حکومتی امور پر گفتگو ہوئی۔ پیپلزپارٹی کے رہنماؤں نے صدر آصف زرداری کو حکومت کے خلاف اپنی شکایات سے آگاہ کیا۔ صدر زرداری نے کہا کہ وہ جانتے ہیں کہ تحریری معاہدے کے نکات پر عملدرآمد نہیں ہو رہا، اور اتحادی حکومت کے ساتھ چلنا ہماری مجبوری ہے۔
انہوں نے مزید کہا کہ آئندہ بجٹ آنے تک مسائل کے حل کی امید رکھیں۔