news
چیمپئنز ٹرافی سے باہر ہونے پر عمران خان کا سخت ردعمل
قومی ٹیم کے چیمپئنز ٹرافی 2025ء سے باہر ہونے کے بعد لیجنڈری کرکٹر اور سابق کپتان عمران خان کا ردعمل سامنے آیا ہے۔ میڈیا رپورٹس کے مطابق عمران خان نے آج اڈیالہ جیل میں زیادہ تر وقت کرکٹ پر بات چیت کی، 1992ء کے ورلڈ کپ کے فاتح کپتان نے پی ٹی وی پر پاک بھارت میچ دیکھا اور وہ شدید غصے میں تھے۔
اڈیالہ جیل میں آج صحافیوں سے گفتگو کرتے ہوئے عمران خان نے کہا کہ جب سفارشی لوگوں کو بٹھایا جائے گا تو کرکٹ تباہ ہو جائے گی۔ انہوں نے محسن نقوی کا ذکر کرتے ہوئے کہا کہ پہلے اسے پنجاب کا چیف منسٹر بنایا گیا، جس نے ظلم کیا، پھر اسے وزیر داخلہ بنایا گیا، اور اس نے بھی ظلم کیا۔ اتنی بری کارکردگی پر ایک عزت دار آدمی مستعفی ہو جاتا ہے، لیکن محسن نقوی مستعفی نہیں ہوگا۔
72 سالہ عمران خان نے مزید کہا کہ محسن نقوی سے پوچھا جائے کہ اس کو کرکٹ کا کیا تجربہ ہے۔
واضح رہے کہ آئی سی سی چیمپئنز ٹرافی میں پہلے نیوزی لینڈ اور پھر بھارت کے ہاتھوں شکست کے بعد میزبان اور دفاعی چیمپئن پاکستان ایونٹ سے باہر ہو گیا ہے۔ پاکستان کرکٹ ٹیم کو اپنا آخری گروپ میچ 27 فروری کو بنگلادیش کے خلاف راولپنڈی میں کھیلنا ہے۔ گروپ اے سے بھارت اور نیوزی لینڈ نے سیمی فائنل کے لیے کوالیفائی کر لیا ہے۔