شبلی فراز کا اڈیالہ جیل کے باہر احتجاجی کیمپ لگانے پر غور

پاکستان تحریک انصاف کے رہنما شبلی فراز نے کہا ہے کہ اڈیالہ جیل کے باہر احتجاجی کیمپ لگانے پر غور کیا جا رہا ہے اور اگلے دو سے چار دنوں میں اس حوالے سے حتمی فیصلہ کیا جائے گا۔ انہوں نے اسلام آباد کی عدالت میں میڈیا سے گفتگو کرتے ہوئے کہا کہ ہم نے عدلیہ، پارلیمنٹ اور جلسے جلوس کے ذریعے اپنی جدوجہد جاری رکھنی ہے۔ شبلی فراز نے مزید کہا کہ پاکستان تحریک انصاف اڈیالہ جیل کے باہر احتجاجی کیمپ لگانے کے بارے میں سنجیدگی سے سوچ رہی ہے۔

انہوں نے یہ بھی کہا کہ ملک میں استحکام کو غلط بیانیے کے ذریعے متاثر کیا جا رہا ہے اور سپریم کورٹ کے فیصلوں پر عملدرآمد نہیں ہو رہا۔ ان کا کہنا تھا کہ جیل کے باہر ہمارا دھرنا پرامن ہوگا اور ہم اپنے مطالبات کے حق میں ہر فورم پر آواز بلند کریں گے۔ پارٹی کے اندر احتجاجی کیمپ کے قیام کے حوالے سے مشاورت جاری ہے۔

چیف جسٹس آف پاکستان سے ملاقات میں بانی پی ٹی آئی عمران خان کی رہائی کے بارے میں سوال کا جواب دیتے ہوئے شبلی فراز نے کہا کہ عمران خان ایسی رہائی نہیں چاہتے بلکہ وہ انصاف کی طلب کر رہے ہیں۔ انہوں نے مزید کہا کہ تمام لوگوں کا عدالتوں میں ٹرائل ہوا ہے، لیکن واحد بانی پی ٹی آئی عمران خان ہیں جن کا جیل ٹرائل ہو رہا ہے۔ مولانا فضل الرحمان کی قیادت میں تحریک کے حوالے سے اگر کوئی بھی ہمارے ساتھ آنا چاہے تو ہم خوش آمدید کہیں گے۔