پی ٹی سی ایل کا پاکستان کو افریقہ-1 سب میرین کیبل سے منسلک کرنے کا اعلان

ٹیلی کام کمپنی پی ٹی سی ایل نے پاکستان کو افریقہ-1 سب میرین کیبل سے منسلک کر کے اپنے ڈیجیٹل اور ٹیلی کام نظام کی بہتری کی جانب ایک اہم قدم اٹھایا ہے۔

ایکسپریس نیوز کے مطابق، یہ سب میرین کیبل جو بڑی مقدار میں ڈیٹا ٹرانسمیشن کی صلاحیت رکھتی ہے، کراچی میں پی ٹی سی ایل ایکسچینج سے منسلک کر دی گئی ہے۔

پی ٹی سی ایل نے افریقہ-1 کیبل سسٹم کنسورشیم میں شمولیت کے لیے باضابطہ معاہدہ کیا ہے تاکہ پاکستان کے عالمی ڈیجیٹل مراکز کے ساتھ روابط کو مستحکم کیا جا سکے اور قومی ٹیلی کمیونی کیشن ڈھانچے کو بہتر بنایا جا سکے۔

یہ کیبل سسٹم تقریباً دس ہزار کلومیٹر طویل ہے اور جدید ترین ٹیکنالوجیز سے لیس ہے، جو پاکستان کو سعودی عرب، متحدہ عرب امارات، مصر، سوڈان، الجیریا، فرانس، کینیا، اور جبوتی جیسے اسٹریٹجک مقامات سے جوڑتا ہے۔

پی ٹی سی ایل کے گروپ نائب صدر برائے انٹرنیشنل بزنس، سید محمد شعیب نے اس موقع پر کہا کہ افریقہ-1 کیبل سسٹم میں ہماری شمولیت پاکستان کے ’ڈیجیٹل وژن 2030‘ کے عین مطابق ہے۔

انہوں نے مزید کہا کہ ہم ڈیجیٹل تقسیم کا خاتمہ کر کے لوگوں کو بااختیار بنانے کے لیے پُرعزم ہیں، تاکہ مختلف شعبوں میں جدت کو فروغ ملے اور ملکی معیشت مستحکم ہو سکے۔

یہ بات بھی قابل ذکر ہے کہ افریقہ-1 کیبل سسٹم 2026 کے اوائل میں فعال ہو جائے گا، جس کے بعد صارفین کو عالمی معیار کی انٹرنیٹ سہولیات دستیاب ہوں گی۔