وزیراعظم شہباز شریف کا ڈیرہ غازی خان میں جلسے سے خطاب

وزیراعظم شہباز شریف نے کہا ہے کہ جب میں باہر جاتا ہوں تو لوگ سمجھتے ہیں کہ میں قرضہ مانگنے گیا ہوں۔ کیا عمران خان قرض بانٹنے جاتے تھے؟ انہوں نے مزید کہا کہ قرضوں کے ساتھ پاکستان ترقی نہیں کر سکتا، دعا کریں کہ ہماری صنعتوں کی چمنیوں سے دھواں نکلے اور ملک ترقی کرے۔ ڈیرہ غازی خان میں مسلم لیگ ن کے جلسے میں خطاب کرتے ہوئے شہباز شریف نے کینسر ہسپتال اور یونیورسٹی بنانے کا اعلان کیا۔ انہوں نے کہا کہ جب ہم نے اقتدار سنبھالا تو مہنگائی 40 فیصد پر تھی، نواز شریف کے لیے یہ فیصلہ کرنا مشکل تھا کہ وہ ملک کو بچائیں یا سیاست کو دیکھیں، لیکن انہوں نے سیاست قربان کرنے اور ملک کو بچانے کا فیصلہ کیا۔ جب میں بیرون ملک جاتا ہوں تو میزبانوں کو یہ محسوس ہوتا ہے کہ میں پیسے مانگنے آیا ہوں، ایک شخص نے کہا تھا کہ جب شہباز شریف باہر جاتا ہے تو لوگ سمجھتے ہیں کہ وہ قرضہ مانگنے گیا ہے، تو میں سوال کرتا ہوں کہ عمران خان کیا قرض بانٹنے جاتے تھے؟

وزیراعظم نے مزید کہا کہ ایک سال پہلے جو مہنگائی 40 فیصد تھی، آج وہ 2.4 فیصد پر آ گئی ہے، کاروباری برادری کے لیے قرضوں پر جو شرح سود 22 فیصد تھی، وہ آج آدھی ہو چکی ہے، ملک ترقی کر رہا ہے، جس پر ہم اللہ کا شکر ادا کرتے ہیں۔ ہم نے جو فیصلہ کیا تھا کہ سیاست قربان کر دیں گے اور ملک کو بچائیں گے، میں سمجھتا ہوں کہ آج ہم اس دور میں پہنچ گئے ہیں۔