news
پنجاب میں شادیوں میں ون ڈش پر سختی سے عملدرآمد کا حکم
وزیراعلیٰ پنجاب مریم نواز شریف نے پنجاب بھر کے ڈپٹی کمشنرز کو ہدایت کی ہے کہ وہ شادی کی تقریبات میں ون ڈش کی پابندی پر سختی سے عملدرآمد کریں۔ انہوں نے ون ڈش کی خلاف ورزی کے واقعات پر اپنی شدید برہمی کا اظہار کرتے ہوئے کہا کہ اگر کسی تقریب میں ون ڈش کی خلاف ورزی ہوتی ہے تو متعلقہ ڈپٹی کمشنر کو ذمہ دار سمجھا جائے گا۔
انتظامیہ کو ہر صورت میں متعلقہ علاقوں میں ون ڈش کی پابندی کو یقینی بنانا ہوگا۔ وزیراعلیٰ مریم نواز نے کہا کہ شادیوں میں ون ڈش کی خلاف ورزی والدین پر مالی بوجھ ڈالتی ہے، اور ایک سے زیادہ ڈشز کے استعمال کے منفی سماجی اثرات بھی مرتب ہوتے ہیں۔
انہوں نے شہریوں سے بھی اپیل کی کہ وہ ایسے رجحانات کے خاتمے میں اپنا کردار ادا کریں، کیونکہ اسلام بھی شادی کی تقریبات میں بے جا نمود و نمائش کی اجازت نہیں دیتا۔ مزید یہ کہ ون ڈش کی پابندی فارم ہاوسز اور پرائیویٹ پراپرٹی میں ہونے والی شادیوں پر بھی لاگو ہوگی۔ انتظامیہ کو ون ڈش کی پابندی کی کڑی نگرانی کرنے کی ہدایت دی گئی ہے۔
لاہور سمیت پنجاب کے ہر ضلع میں ون ڈش کے قانون پر مکمل عمل درآمد کیا جائے گا، اور خلاف ورزی کی صورت میں جرمانے اور قواعد کے مطابق کارروائی کی جائے گی۔