فواد چوہدری کا شعیب شاہین سے صلح کا دعویٰ، شعیب شاہین کا انکار

سابق وفاقی وزیر فواد چوہدری نے پی ٹی آئی رہنماء شعیب شاہین کے ساتھ صلح ہونے کا دعویٰ کیا ہے، لیکن شعیب شاہین نے اس دعوے کی تردید کرتے ہوئے صلح کرنے سے انکار کر دیا۔ فواد چوہدری نے کہا کہ ہم نے بانی پی ٹی آئی عمران خان کے کہنے پر صلح کی ہے۔ راولپنڈی کی اڈیالہ جیل کے باہر میڈیا سے گفتگو کرتے ہوئے انہوں نے بتایا کہ شعیب شاہین نے عمران خان کا نام لے کر انہیں بھگوڑا کہا ہے۔

جب انہوں نے اس بات کی تصدیق عمران خان سے کی تو انہوں نے کہا کہ ایسا کچھ نہیں کہا گیا۔ فواد چوہدری نے شعیب شاہین کو یہ بھی کہا تھا کہ وہ عمران خان کا نام لے کر ایسی باتیں نہ کریں۔ شعیب شاہین روزانہ انہیں ٹی وی پروگرامز اور سوشل میڈیا پر نشانہ بناتا رہتا ہے۔

فواد چوہدری نے مزید کہا کہ بانی پی ٹی آئی کے حکم پر یہ معاملہ ختم ہو چکا ہے اور ہم نے صلح کر لی ہے۔

جب ایک صحافی نے فواد چوہدری سے سوال کیا کہ کیا آپ نے خود ہی مکا مارا اور پھر خود ہی صلح بھی کر لی؟ تو انہوں نے جواب دیا کہ جب مکا مارا تھا تو صلح بھی مجھے ہی کرنی تھی۔ دوسری جانب، پاکستان تحریک انصاف کے رہنماء بیرسٹر شعیب شاہین نے کہا کہ وہ فواد چوہدری کو کبھی معاف نہیں کریں گے اور یہ کہ فواد جھوٹ بول کر گئے ہیں، انہوں نے ان سے کوئی صلح نہیں کی۔ اڈیالہ جیل کے باہر میڈیا سے گفتگو کرتے ہوئے انہوں نے یہ باتیں کیں۔