news
سپریم کورٹ کے 7 نئے ججز نے حلف اٹھا لیا
سپریم کورٹ آف پاکستان میں تعینات ہونے والے 7 نئے ججز نے حلف اٹھا لیا۔ یہ تقریب حلف برداری پہلی بار عدالتی احاطے کے لان میں منعقد ہوئی، جہاں چیف جسٹس پاکستان یحییٰ آفریدی نے تمام سات ججز سے حلف لیا۔ اس تقریب میں اسلام آباد ہائیکورٹ کے جج محسن اختر کیانی، اٹارنی جنرل، وکلاء، لاء افسران اور عدالتی سٹاف بھی موجود تھے۔
نئے 6 مستقل ججز اور ایک قائم مقام جج کی حلف برداری میں جسٹس عامر فاروق، جسٹس ہاشم کاکڑ، جسٹس اشتیاق ابراہیم، جسٹس شکیل احمد، جسٹس شفیع صدیقی اور جسٹس صلاح الدین پنہور شامل ہیں۔ اس کے علاوہ، جسٹس میاں گل حسن اورنگزیب نے بھی بطور ایکٹنگ جج سپریم کورٹ حلف لیا، جس کا حلف چیف جسٹس پاکستان یحییٰ آفریدی نے لیا۔
یاد رہے کہ گزشتہ روز یہ بتایا گیا تھا کہ سپریم کورٹ آف پاکستان میں نئے ججز کی تقریب حلف برداری کا شیڈول تبدیل کر دیا گیا تھا۔ نئے ججز کی حلف برداری جمعہ کو ہونی تھی، لیکن ججز کے نوٹیفکیشن میں تاخیر کی وجہ سے یہ تقریب ملتوی کر دی گئی۔ وزارت قانون کی جانب سے نئے ججز کے تقرر کا نوٹیفکیشن رات گئے جاری کیا گیا تھا۔ سابقہ شیڈول کے مطابق 6 مستقل اور ایک عارضی جج کی تقریب حلف برداری گزشتہ روز ہونا تھی۔