نواز شریف کا ن لیگ کو تنظیمی سطح پر مضبوط بنانے کا فیصلہ

پاکستان مسلم لیگ ن کے صدر نواز شریف نے کہا ہے کہ بے ایمانی کے ساتھ آنے والے شخص نے ملک کی بنیادیں ہلا دی تھیں، لیکن ہم نے پاکستان کی خاطر ہنستے ہوئے قربانیاں دیں اور آئندہ بھی دریغ نہیں کریں گے۔ میڈیا رپورٹس کے مطابق نواز شریف اور وزیر اعلیٰ پنجاب مریم نواز سے پنجاب اسمبلی کے ارکان نے ملاقات کی۔ اس دوران ارکان اسمبلی سے گفتگو کرتے ہوئے نواز شریف نے کہا کہ شہباز شریف کی محنت رنگ لا رہی ہے، زوال کا رخ ترقی کی طرف موڑ دیا ہے۔ معاشی اعشاریوں کی بہتری پاکستان کی بہتری ہے، اور ہم معیشت میں بہتری لا کر ایک بار پھر پاکستان کو سنوار رہے ہیں۔ اللہ تعالیٰ کا شکر ہے کہ پاکستان سیاہ اندھیروں سے باہر آ رہا ہے، اور مسلم لیگ ن نے یہ ثابت کر دیا ہے کہ ہم ہی ملک کی خدمت کرتے ہیں اور عوام کو ریلیف دیتے ہیں۔

انہوں نے مزید کہا کہ پالیسی ریٹ میں 22 سے 12 فیصد کی کمی سے معاشی سرگرمیاں بڑھ رہی ہیں اور معیشت کو فائدہ ہو رہا ہے۔ روپیہ مستحکم ہوا ہے اور گروتھ میں اضافہ ہو رہا ہے، جبکہ اسٹاک ایکسچینج بلند ترین سطح پر ہے اور مہنگائی کم ہو رہی ہے۔ عالمی مالیاتی ادارے آئی ایم ایف نے بھی معاشی بحالی اور پاکستان کی ترقی کی طرف بڑھنے کا اعتراف کیا ہے۔ اسی طرح پنجاب کی رونقیں اور خوشیاں بھی بحال ہو رہی ہیں، اللہ نظر بد سے بچائے۔